បរទេស៖ ក្លិបយក្សអ៊ីតាលី AC Milan កំពុងតែចរចាដើម្បីចុះហត្ថលេខាជាមួយនឹងខ្សែបម្រើអន្តរជាតិម៉ារ៉ុក Hakim Ziyech។ នេះបើយោងទៅតាមការចេញផ្សាយរបស់សារព័ត៌មានចក្រភពអង់គ្លេស។ បើទោះបីទើបតែបានឈ្នះពានក្របខ័ណ្ឌ Serie A ក៏ដោយ ប៉ុន្តែ ក្លិប AC Milan កំពុងតែសម្លឹងរកពង្រឹងក្រុមរបស់ខ្លួន នៅមុនពេលចាប់ផ្តើមរដូវកាលថ្មី។
ថ្នាក់ដឹកនាំរបស់ក្លិប Chelsea ចាត់ទុក Ziyech ជាកីឡាករដែលត្រូវលក់ចេញ ស្របពេលដែលកីឡាកររូបនេះ ក៏ចង់ចាកចេញទៅកាន់ក្លិបថ្មីផងដែរ។ ប៉ុន្តែ បញ្ហាប្រឈម គឺទាក់ទងនឹងប្រាក់បៀរវត្សរ៍របស់គេ ពោលគឺស្ថិតក្នុងតំហំទឹកប្រាក់ច្រើនជាងកញ្ចប់ទឹកប្រាក់ ដែល AC Milan ចង់ផ្តល់ឲ្យ។ AC Milan កំពុងតែពិភាក្សាផ្ទៃក្នុងលើបញ្ហានេះ និងជាមួយនឹងភ្នាក់ងារតំណាងឲ្យកីឡាករវ័យ២៩ឆ្នាំរូបនេះ។
Ziyech មិនបានបង្ហាញខ្លួនជាមួយនឹងក្រុមរបស់លោក Tuchel ជាទៀងទាត់ឡើយកាលពីរដូវកាលមុន ដោយបានចូលលេងក្នុងជម្រើសដំបូងត្រឹមតែ១៩លើកគត់ ក្នុងចំណោមការប្រកួត៤៨លើករបស់ Chelsea ក្នុងក្របខ័ណ្ឌ Premier League និង Champions League។ រូបគេបានផ្ទេរមកពីក្លិប Ajax ក្នុងតម្លៃខ្លួនជាគោលចំនួន៤០លានអឺរ៉ូ (ស្មើនឹង៤២លានដុល្លារអាមេរិក) កាលពីឆ្នាំ២០២០ ក្នុងកិច្ចសន្យារយៈពេល៥ឆ្នាំ៕
ប្រភពព័ត៌មាន៖ Sky Sports