បរទេស៖ លោក Christophe Galtier ត្រូវបានតែងតាំងជាគ្រូបង្វឹករបស់ក្រុមម្ចាស់ជើងឯកបារាំង Paris Saint-Germain ក្នុងកិច្ចសន្យារយៈពេល២ឆ្នាំ។ នេះបើយោងទៅតាមប្រភពនានា កាលពីថ្ងៃចន្ទ។ លោក Galtier ដែលបានចំណាយបេលកាលពីរដូវកាលមុនក្នុងនាមជាគ្រូបង្វឹករបស់ក្លិប Nice នោះ នឹងចូលកាន់តំណែងជំនួសលោក Mauricio Pochettino សញ្ជាតិអាហ្សង់ទីន។
គ្រូបង្វឹកវ័យ៥៥ឆ្នាំរូបនេះ ត្រូវបានគេថតជាប់ពេលធ្វើដំណើរទៅដល់ការិយាល័យរបស់ PSG នៅជាយទីក្រុងប៉ារីស កាលពីថ្ងៃចន្ទ ស្របពេលដែលសន្និសីទសារព័ត៌មានត្រូវបានគ្រោងរៀបចំឡើងនៅកីឡដ្ឋាន Parc des Princes នាថ្ងៃអង្គារនេះ។ PSG បានខិតខំព្យាយាមតែងតាំងគ្រូបង្វឹកថ្មីម្នាក់ អស់រយៈពេលជាច្រើនសប្តាហ៍មកហើយ ប៉ុន្តែ មិនមានការផ្លាស់ប្តូរណាមួយត្រូវបានបំពេញជាផ្លូវការឡើយ ស្របពេលដែលលោក Pochettino និងបុគ្គលិកគ្រូបង្វឹករបស់លោកនៅតែជាប់កិច្ចសន្យានៅឡើយ។
សមាជិកក្រុម PSG ត្រូវតែធ្វើការបង្ហាញខ្លួនសម្រាប់ការហ្វឹកហាត់មុនបើករដូវកាលនៅថ្ងៃចន្ទ លើកលែងតែកីឡាករដែលជាប់បំពេញការតព្វកិច្ចជាអន្តរជាតិប៉ុណ្ណោះ។ លោក Galtier ដែលបានចាកចេញពីក្លិប Nice របស់ក្របខ័ណ្ឌ Ligue 1 កាលពីខែមុន បានកសាងកេរិ៍្តឈ្មោះរបស់លោកក្នុងនាមជាគ្រូបង្វឹកឈានមុខគេក្នុងកីឡាបាល់ទាត់របស់បារាំង ក្នុងរយៈពេល១ទសវត្សរ៍ចុងក្រោយនេះ៕
ប្រភពព័ត៌មាន៖ Channel News Asia
