បរទេស៖ ក្លិបតោខៀវ Chelsea បានឆ្លើយតបទៅស្ថានភាព ដែលក្រុម Barcelona កំពុងតែបោះជំហានក្នុងការនាំយកខ្សែបម្រើស្លាប Raphinha ពីក្លិប Leeds United តាមរយៈការបញ្ចេញផែនការថ្មី ក្នុងតំបន់ប្រយុទ្ធ ស្របពេលដែលកីឡាករ Rafael Leao របស់ក្លិប AC Milan និងខ្សែបម្រើដ៏មានឥទ្ធិពល Serge Gnabry របស់ក្លិប Bayern Munich សុទ្ធសឹងស្ថិតក្នុងការចាប់អារម្មណ៍របស់លោក Thomas Tuchel។
ក្លិប Leeds បានទទួលយកសំណើក្នុងទឹកប្រាក់៥៥លានផោន (ស្មើនឹង៦៥,៥លានដុល្លារអាមេរិក) សម្រាប់ Raphinha ពីក្លិប Chelsea ដែលនឹងត្រូវប្រកាសពីការចុះហត្ថលេខាជាមួយនឹង Raheem Sterling ក្នុងតម្លៃខ្លយន៥០លានផោនពីក្លិប Manchester City ក្នុងពេលឆាប់ៗនេះ។
ប៉ុន្តែ ខ្សែបម្រើស្លាបប្រេស៊ីល Raphinha ហាក់ដូចស្ទាក់ស្ទើរក្នុងការផ្ទេរទៅកាន់កីឡដ្ឋាន Stamford Bridge។ បំណែងរបស់កីឡាករវ័យ២៥ឆ្នាំរូបនេះ គឺការចូលរួមជាមួយនឹងក្លិប Barça ហើយក្លិបស្ថិតក្នុងក្របខ័ណ្ឌ La Liga មួយនេះ ទំនងដូចជាត្រៀមជម្នះលើបញ្ហាហិរញ្ញវត្ថុរបស់ខ្លួន តាមរយៈការដាក់សំណើដ៏ស័ក្តិសមមួយដើម្បីទិញយក Raphinha ដែលជាអតីតកីឡាកររបស់ក្លិប Rennes។
ការមិនអាចទិញយក Raphinha គឺជាការខកចិត្តមួយសម្រាប់លោក Tuchel។ គ្រូបង្វឹករបស់ក្លិប Chelsea រូបនេះ ចង់បានកីឡាករដែលមានភាពមុតស្រួច និងល្បឿនលឿន ហើយគេរំពឹងទុកថា រូបលោកនឹងផ្តោតលើខ្សែប្រយុទ្ធ ដែលអាចលេងក្នុងទីតាំងជាច្រើនបាន។ លោក Tuchel ចង់បង្កើតតំបន់ប្រយុទ្ធដែលមានភាពបត់បែនបន្ថែមទៀត ក្រោយពីមិនមានភាពស៊ីសង្វាក់គ្នាជាមួយនឹង Romelu Lukaku កាលពីរដូវកាលមុន៕
ប្រភពព័ត៌មាន៖ The Guardian