បរទេស៖ ក្រុម Manchester United បានចាប់ផ្តើមយ៉ាងល្អក្នុងការប្រកួតមុនបើករដូវកាលរបស់ពួកគេ តាមរយៈការដណ្តើមបានជ័យជម្នះក្នុងលទ្ធផល ៤-០ លើក្រុម Liverpool ក្នុងប្រទេសថៃ កាលពីថ្ងៃអង្គារ ដើម្បីជួយឲ្យគ្រូបង្វឹកថ្មីលោក Erik ten Hag ជួបការជឿជាក់ដ៏ធំមួយ ក្នុងការប្រកួតជាលើកដំបូងរបស់លោកក្នុងនាមជាគ្រូបង្វឹក។
Liverpool ទំនងដូចជាអស់កម្លាំង និងមានទម្រង់លេងមិនរស់រវើក ក្នុងការប្រកួតនេះ ពេលប៉ះជាមួយនឹង Man United ដែលមានភាពរឹងមាំជាង និងបានដណ្តើមយកប្រៀបចំពោះការប្រព្រឹត្តកំហុសនានានៅតង់ទី១ ក្នុងទីក្រុងបាងកក ដើម្បីស៊ុតបាល់បញ្ចូលទី៣គ្រាប់ ក្នុងចន្លោះពេលត្រឹមតែ២១នាទី មុននឹងបន្ថែម១គ្រាប់ទៀតនៅជិតបញ្ចប់ការប្រកួត។ លទ្ធផលនេះ បានជួយឲ្យលោក Ten Hag និងក្រុមថ្មីរបស់លោក ទទួលបានជ័យជម្នះដ៏គួរឲ្យជឿជាក់មួយ ក្នុងការប្រកួតកម្តៅសាច់ដុំជាលើកដំបូងរបស់ពួកគេ នៅមុនពេលចាប់ផ្តើមយុទ្ធនាការថ្មីនៃក្របខ័ណ្ឌ Premier League នៅខែក្រោយ។
លោក Ten Hag សញ្ជាតិហូឡង់ ដែលបានចូលកាន់តំណែងនៅ Old Trafford តិចជាងរយៈពេល២ខែមុននោះ បានឲ្យដឹងថា៖ «ខ្ញុំពេញចិត្តនឹងលទ្ធផលនៅថ្ងៃនេះ។ នេះគឺជាក្រុមមួយដែលមានស្មារតីដ៏អស្ចារ្យ ហើយយើងដឹងថា យើងទើបតែបានចាប់ផ្តើមប៉ុណ្ណោះ»៕
ប្រភពព័ត៌មាន៖ Channel News Asia
