ការប្រកួតរវាងជម្រើសជាតិអេស្ប៉ាញ និងក្រុមជម្រើសជាតិព័រទុយហ្គាល់បានប្រព្រឹត្តទៅយ៉ាងក្តៅគគុកតែម្តង ប៉ុន្តបានបញ្ចប់ដោយលទ្ធផលស្មើគ្នា ៣ – ៣ ក្នុងការប្រកួតពូល B នៃ FIFA World Cup 2018 នៅប្រទេសរុស្ស៊ី។
ក្រុមព័រទុយហ្គាល់
ការប្រកួតវេលាម៉ោង១យប់រំលងអាធ្រាត្រទទួលបានការចាប់អារម្មណ៍យ៉ាងខ្លាំងដោយដំណើរបានតែ៤នាទីប៉ុណ្ណោះគ្រាប់បាល់ក៏កើតឡើង។ ខ្សែប្រយុទ្ធមុតស្រួច Christiano Ronaldo បានអូសបាល់ចូលទីតំបន់គ្រោះថ្នាក់ ហើយត្រូវបានខ្សែការពារអេស្ប៉ាញទាក់ជើង។ អាជ្ញាកណ្តាលបានផ្តល់បាល់ពិន័យ១១ម៉ែត្រដែលធ្វើឲ្យ CR7 ស៊ុតបានសម្រេចដើម្បីនាំមុខ ១-០ ត្រឹមនាទី៤។
បន្ទាប់ពីគេនាំមុខ អេស្ប៉ាញបានព្យាយាមវាយសម្រុក និងបានបញ្ចប់ភាពរីករាយរបស់ព័រទុយហ្គាល់នៅនាទីទី២៤តាមរយៈការស៊ុតចូលទីដ៏អស្ចារ្យដោយខ្សែប្រយុទ្ធ Diego Costa ដើម្បីតាមស្មើ ១-១។ ក្រោយពេលតាមស្មើ អេស្ប៉ាញនៅតែវាយសម្រុកខ្លាំង ខណៈព័រទុយហ្គាល់ព្យាយាមលេងបាល់មួយៗ និងការពារច្រើន។ យ៉ាងណានៅនាទីទី៤៤ ព័រទុយហ្គាល់បានទម្លាយសំណាញ់ទីរបស់អេស្ប៉ាញជាលើកទី២ដែលគ្រាប់បាល់នេះកើតចេញពីខ្សែប្រយុទ្ធលេខ៧ដដែលដើម្បីនាំមុខ ២-១។
ក្រុមអេស្ប៉ាញ
ការប្រកួតនៅវគ្គទី២ អេស្ប៉ាញនៅតែបង្ហាញទម្រង់លេងល្អដដែលដោយបានដាក់សម្ពាធលើព័រទុយហ្គាល់ជាបន្តបន្ទាប់។ ការដាក់សម្ពាធនេះពិតជាបានលទ្ធផលមែនដោយ Diego Costa ស៊ុតគ្រាប់បាល់ទី២នៅនាទីទី៥៥ដើម្បីតាមស្មើ ២-២។ ៣នាទីបន្ទាប់ពោលគឺនាទីទី៥៨ ខ្សែការពារ Fernendez បានស៊ុតដ៏អស្ចារ្យចូលទីបានសម្រេចដើម្បីនាំមុខ ៣-២ វិញម្តង។
តាមរយៈគ្រាប់បាល់នាំមុខ និងមានប្រៀប ក្រុមអេស្ប៉ាញបានព្យាយមលេងមួយៗដោយមិនខំប្រឹងសម្រុកខ្លាំងឡើយ។ ចំណែកព័រទុយហ្គាល់បានបង្កើតការដាក់គំនាបជាបន្តបន្ទាប់ និងកាន់តែវាយសម្រុកខ្លាំងនៅចុងវគ្គទី២។ ទីបំផុតព័រទុយហ្គាល់ទទួលបានបាល់ពិន័យហ្វ្រីឃីកនៅនាទីទី៨៨។ វាពិតជាអស្ចារ្យណាស់ Ronaldo ស៊ុតបាល់ហ្វ្រីឃីកយ៉ាងល្អចូលទីអេស្ប៉ាញបានសម្រេចដើម្បីតាមស្មើ ៣-៣។
លទ្ធផល ៣-៣ នេះរក្សារហូតចប់ការប្រកួតដែលក្រុមទាំងពីរចែកគ្នាបាន១ពិន្ទម្នាក់ប៉ុណ្ណោះ។ ពូល B នេះក្រុមអ៉ីរ៉ង់មាន៣ពិន្ទុឈរលេខ១ ខណៈព័រទុយហ្គាល់ និងអេស្ប៉ាញឈរលេខ២ និងលេខ៣ដោយមាន១ពិន្ទុស្មើគ្នា ហើយម៉ារ៉ុកនៅបាតតារាង៕
ប្រភពពី: Sabay
អស់ទាស់ខ្សែប្រយុទ្ធឆ្នើម Ronaldo ស៊ុត៣គ្រាប់ម្នាក់ឯង ជួយ ព័រទុយហ្គាល់ តាមស្មើ អេស្ប៉ាញ ៣-៣(វិដេអូ)
អត្ថបទទាក់ទង
