ខ្សែប្រយុទ្ធ Luis Suarez បានរងការឈឺចាប់ជើងពេលកំពុងហ្វឹកហាត់ ខណៈឱកាសដែលកីឡាករ Edinson Cavani នឹងចាប់ផ្ដើមប្រកួត ពេលប៉ះក្រុមជម្រើសជាតិបារាំង កំពុងស្ថិតក្នុងភាពមិនច្បាស់លាស់។
ខ្សែប្រយុទ្ធ Suarez ក្នុងថ្ងៃអង្គារនេះ ត្រូវបានរាយការណ៍ថាបានពើបប្រទះនឹងការឈឺជើងស្ដាំក្នុងអំឡុងពេលហ្វឹកហាត់ជាមួយក្រុមជម្រើសជាតិអ៊ុយរុយហ្គាយ។ ទោះជាយ៉ាងណា កីឡាករអាចធ្វើបានសម្រេចក្នុងការត្រលប់មកបញ្ចប់ការហ្វឹកហាត់វិញ។ យ៉ាងនេះក្ដី មានមជ្ឈដ្ឋានមួយចំនួនក្នុងក្រុមជម្រើសជាតិព្រួយបារម្ភ ខ្លាចខ្សែប្រយុទ្ធរងរបួស។
ចំណែកឯ ខ្សែប្រយុទ្ធ Edinson Cavani វិញ បានរងរបួសសរសៃពួរក្នុងប្រកួតដែលអ៊ុយរុយហ្គាយ បានយកឈ្នះព័រទុយហ្គាល់ក្នុងលទ្ធផល ២-១ កាលពីពេលកន្លងទៅ។ លទ្ធផលនៃការពិនិត្យរបស់គ្រូពេទ្យកាលពីថ្ងៃម្សិលមិញ បានឲ្យដឹងថា កីឡាករ PSG មិនបានការដាច់សរសៃសាច់ដុំនោះទេ។ ទោះជាមានការវិវត្តន៍បែបនេះក្ដី ខ្សែប្រយុទ្ធត្រូវបានរាយការណ៍ថា មិនបានចូលហ្វឹកហាត់ជាមួយមិត្តរួមក្រុមខ្លួនឡើយក្នុងថ្ងៃនេះ ដោយកីឡាករធ្វើការហ្វឹកហាត់ដាច់ដោយឡែកម្នាក់ឯង។ ការណ៍នេះ ត្រូវបាន Four Four Two បញ្ជាក់ថា ធ្វើឲ្យឱកាសដែល Cavani នឹងចាប់ផ្ដើមការប្រកួតពេលប៉ះក្រុមមាន់គកបារាំងស្ថិតក្នុងភាពមិនច្បាស់លាស់។
អ៊ុយរុយហ្គាយ នឹងត្រូវប្រកួតជាមួយបារាំងក្នុងវគ្គ ៨ ក្រុមចុងក្រោយ World Cupនៅថ្ងៃសុក្រខាងមុខនេះ វេលាម៉ោង ៩ យប់ (ម៉ោងនៅកម្ពុជា)៕
Via :news.sabay
