ក្រុមអធិរាជស Real Madrid បានធ្វើពិធីបង្ហាញវត្តមានខ្សែការពារថ្មីគឺកីឡាករ Alvaro Odriozola នៅឯកីឡាដ្ឋាន Santiago Bernabeu មុខទស្សនិកជនគាំទ្របីរយនាក់កាលពីថ្ងៃពុធ ខណៈដែលក្រុមម្ចាស់ជើងឯក Champion League ១៣សម័យមួយនេះ ត្រៀមចាប់ផ្តើមរដូវកាលថ្មីដោយគ្មានតារាឆ្នើម កីឡាករខ្សែប្រយុទ្ធស្លាប Cristiano Ronaldo ដែលបានផ្ទេរទៅលេងនៅក្រុមស្រ្តីជរា Juventus ទៅហើយ។ Odriozola កីឡាករខ្សែការពារស្តាំសញ្ជាតិអេស្ប៉ាញវ័យ ២២ឆ្នាំរូបនេះបានចុះហត្ថលេខាផ្ទេរពីក្រុម Real Sociedad ក្នុងតម្លៃ ៣៥លានផោន។

Odriozola បានជាប់ឈ្មោះនៅក្នុងក្រុមជម្រើសជាតិអេស្ប៉ាញសម្រាប់ព្រឹត្តការណ៏ប្រកួត World Cup ២០១៨ នៅប្រទេសរុស្ស៊ី ប៉ុន្តែមិនបានបង្ហាញវត្តមានចូលលេងនៅក្នុងការប្រកួតណាមួយនៃការប្រកួតទាំងបួនរបស់ពួកគេខណៈក្រុមរហស្សនាមគោព្រៃអេស្បាញមួយនេះ បានធ្លាក់ចេញដ៏គួរអោយភ្ញាក់ផ្អើលពីការប្រកួតកាត់សេចក្តីស៊ុតបាល់ប៉េណាល់ទី ៥គ្រាប់ម្នាក់ក្រោមថ្វីជើងក្រុមម្ចាស់ផ្ទះរុស្សី ក្នុងវគ្គ ១៦ក្រុមចុងក្រោយ។

ការចុះហត្ថលេខានាំយក Odriozola នៅរដូវក្តៅនេះគឺរូបគេបានក្លាយជាសមាជិកថ្មីទី៣ របស់ក្រុមបន្ទាប់ពីអ្នកចាំទីវ័យក្មេង សញ្ជាតិអ៊ុយក្រែន Andriy Lunin និងកីឡាករប្រេស៊ីល Vinicius Junior ខណៈ Odriozola និងត្រូវតស៊ូដើម្បីបង្ហាញខ្លួន ក្នុងជម្រើស ១១នាក់ដំបូង ជាមួយនិងកីឡាករ Dani Carvajal របស់គ្រូបង្វឹកថ្មីលោក Lopetegui នោះ។