នៅក្នុងទីក្រុងតូចមួយរបស់អ៊ីតាលីដែលមានដង់ស៊ីតេប្រជាជនចំនួន ៤.000នាក់មានអ្នកគាំទ្ររហូតដល់ទៅចំនួន ៥000នាក់បានប្រមូលផ្ដុំគ្នានៅកីឡាដ្ឋានដើម្បីទស្សនាកំពូលស៊ូភើស្តា Cristiano Ronaldo ដែលស៊ុតបញ្ចូលទីនៅនាទីទី៨ សម្រាប់ការបង្ហាញខ្លួនលើកដំបូង នៅក្នុងឯកសណ្ឋានអាវក្រុមស្រ្តីជរា Juventus។

ការប្រកួតមិត្តភាពដែលប្រារព្ធឡើងជារៀងរាល់ឆ្នាំ របស់ក្លិបបានធ្វើឡើងក្នុងជំនួបជាមួយក្រុម Juventus U21 នៅភូមិតូចមួយឈ្មោះថា Villar Perosa ជិតនិងទីក្រុង​ Turin។ Ronaldo ម្ចាស់ពានរង្វាន់ Ballon d’Or ប្រាំសម័យមាន វ័យ ៣៣ឆ្នាំរូបនេះ បានចុះហត្ថលេខាផ្ទេរពីក្រុមអធិរាជស Real Madrid ក្នុងតម្លៃ ៩៩,២លានផោន កាលពីខែកក្កដាបានស៊ុតបាល់បញ្ចូលទីគ្រាប់ទីមួយ និងបានបង្កើតឪកាសស៊ុតបញ្ចូលទីមួយផ្សេងទៀត(Assist) កាលពីថ្ងៃអាទិត្យដើម្បីទទួលជ័យជម្នះលើក្រុម Juventus U21 ក្នុងលទ្ធផល ៥-0។

ប៉ុន្តែការប្រកួតត្រូវបានចាត់ទុកជាមិនបានការក្រោយពេល ប្រកួតបាន ៧២នាទី ដោយសារតែអ្នកគាំទ្របានរត់ចូលពេញទីលានប្រកួត។ អ្វីដែលជារឿងគួរកត់សម្គាល់គឺ ខ្សែការពារ Leonardo Bonucci ដែលបានចុះហត្ថលេខាផ្ទេរមកចូលរួមជាមួយក្រុម Juventus វិញក្រោយពីបានចំណាយពេល ១រដូវកាលលេងអោយក្រុម AC Milan ត្រូវបានប្រិយមិត្តគាំទ្រសំដកយកខោក្នុងរបស់គេផងដែរ ។