បាល់ទាត់៖ ​អតីត​កីឡាករ​របស់ Real Madrid, Inter Milan និង​ក្រុម​ជំរើសជាតិ​ហូ​ឡង់ Wesley Sneijder ​បាន​ប្រកាស​ចូល​និវត្តន៍​ពី​អាជីព​កីឡាបាល់ទាត់​ហើយ ក្រោយ​ចំណាយ​ពេល ១៧​ឆ្នាំ​។ ​បុរស​វ័យ ៣៥​ឆ្នាំ​រូប​នេះ​ធ្លាប់​បាន​បង្ហាញខ្លួន​ជា​កំណត់ត្រា ​អោយ​ក្រុម​ជំរើស​ជាតិ​ហូ​ឡង់ ១៣៤​ប្រកួត និង​ជា​សមាជិក​សំខាន់​ក្នុង​ការ​ជួយ​ក្រុម​ទឹកក្រូច​ហូ​ឡង់​ ឡើង​វគ្គ​ផ្ដាច់ព្រ័ត្រ World Cup 2010 នៅ​អាហ្វ្រិក​ខាង​ត្បូង​តែ​ចាញ់​អេ​ស្ប៉ា​ញ​។

​​សមិទ្ធផល​ជាច្រើន​ដែល Wesley Sneijder ​ធ្វើ​បាន​ជាមួយ​ក្លិប​អាជីព​ រួមមាន​ឈ្នះ​ជើងឯក​លី​គ​កំពូល​ហូ​ឡង់​ជាមួយ Ajax Amsterdam និង​ហូ​ឡង់​ខាប់​ពីរ​ដង មុន​ពេល​ផ្លាស់​ទៅ Real Madrid ក្នុង​តំលៃ ២៣​លាន​ផោន​នៅ​ឆ្នាំ២០០៧​ ឈ្នះ​ជើងឯក La Liga​ ជាពិសេស​ជោគជ័យ​បំផុត​ជាមួយ Inter Milan ដែល​ឈ្នះ​ជើងឯក Italia Serie A, Champions League និង Coppa Italia នៅ​រដូវ​កាល ២០០៩–២០១០​ មុន​បន្ត​ដំណើរ​ទៅ Galatasaray, Nice និង Al Gharafa​ នៅ​កាតា​។​ ​នៅ​ពេល​នេះ Wesley Sneijder​ ទទួល​បាន​ការងារ​ជាមួយ​ក្លិប​បាល់ទាត់ FC Utrecht ក្នុងស្រុក​កំណើត​៕

​អត្ថបទ​៖​នាង សុភា​វុ​ធ Credit: BTV