បាល់ទាត់៖ កីឡាករប្រេស៊ីល Dani Alves បានស៊ុតបញ្ចូលទីក្នុងប្រកួតដំបូង នៃការបង្ហាញខ្លួនអោយក្រុមថ្មីលើទឹកដីកំណើត Sao Paulo និងជាគ្រាប់ជ័យជំនះលើ Ceara ១–០ នៅក្របខណ្ឌលីគកំពូលប្រេស៊ីល Serie A។
កីឡាករវ័យ ៣៦ឆ្នាំរូបនេះបានចាកចេញពីក្លិបជើងឯកបារាំង Paris Saint Germain កាលពីដើមខែ ក្រោយកិច្ចសន្យាអស់សុពលភាព។ ទោះបីជាមានតំណែងជាខ្សែការពារស្លាបស្តាំ តែការបង្ហាញខ្លួនប្រកួតដំបូងឲ្យ Sao Paulo, Dani Alves ត្រូវបានគ្រូបង្វឹកឲ្យឡើងមកលេងខ្សែបំរើ ហើយក៏រកគ្រាប់បាល់បាននៅនាទីទី៤០។
ថ្មីៗនេះ Dani Alves គឺជាប្រធានក្រុមជំរើសជាតិប្រេស៊ីលក្នុងព្រឹត្តិការណ៍ Copa America ដែលប្រេស៊ីលជា ជើងឯក។ Dani Alves គឺជាកីឡាករតែម្នាក់គត់ដែលឈ្នះពានសរុប៤០ ទាំងក្លិបអាជីព និងជាមួយក្រុមជំរើសជាតិ៕
អត្ថបទ៖នាង សុភាវុធ
