បាល់ទាត់៖ ក្លិបបាល់ទាត់សេះបង្កង់ Juventus បានបញ្ជាក់ឱ្យដឹងថា លោក Maurizio Sarri ត្រូវបានក្រុមគ្រូពេទ្យវិនិច្ឆ័យឃើញថា កំពុងទទួលរងជំងឺរលាកសួត បន្ទាប់ពីលោកមានអាការៈផ្ដាសាយជាច្រើនថ្ងៃ។
អាការៈជំងឺរបស់លោក Sarri បានកើតឡើងតាំងពីអំឡុងមួយសប្ដាហ៍មុនមកម្ល៉េះ ដែលបណ្តាលឱ្យលោកត្រូវការពិនិត្យ និងព្យាបាលជាបន្ទាន់ ដែលតម្រូវឱ្យលោកអវត្តមានពីទីលាន ក្នុងការប្រកួតកន្លងមករាប់ទាំងការប្រកួតមិត្តភាពក្នុងដីរវាងក្រុម Juventus ទល់នឹងក្រុមយុវជន Villar Perosa របស់ខ្លួន ព្រមទាំងការប្រកួតមិត្តភាពជាមួយក្លិប Triestina មុនបើករដូវកាលថ្មីទៀតផង។
ដោយឡែកចំពោះសេចក្ដីថ្លែងការណ៍របស់ក្លិប Juventus ក៏បានបញ្ជាក់ថា “លោក Maurizio Sarri បានធ្វើការសម្រាកពីក្លិបកាលពីចុងសប្ដាហ៍មុន ដោយបានសម្របសម្រួលទទួលខុសត្រូវមកកាន់បុគ្គលិក និងក្រុមការងាររបស់គាត់។ លោក Sarri មិនអាចមកបង្ហាត់ក្លិបបានឡើយ បន្ទាប់ពីលោកមានអាការៈផ្ដាសាយធ្ងន់ធ្ងរកាលពីសប្ដាហ៍មុន ខណៈដែលក្រុមវេជ្ជបណ្ឌិតបានពិនិត្យ និងតាមដានអាការៈរបស់លោក និងបានបញ្ជាក់ថា គាត់កំពុងតែកើតជំងឺរលាកសួត”។
គួរឱ្យដឹងផងដែរថា លោក Maurizio Sarri គឺជាគ្រូបង្វឹកម្នាក់ដែលល្បីល្បាញ ពីការជក់បារីខ្លាំងក្លាលើសកម្រិតរបស់គាត់ ដោយអតីតគ្រូបង្វឹក Chelsea រូបនេះត្រូវបានគេរាយការណ៍ថា ជក់បារីប្រហែលជា ៦០ដើមក្នុងមួយថ្ងៃ។ សូមជម្រាបផងដែរថា ក្លិប Juventus នឹងត្រូវត្រៀមខ្លួនសម្រាប់ការបើករដូវកាលថ្មី Serie A ដោយត្រៀមប៉ះក្រុម Parma នៅក្រៅដីនាចុងសប្ដាហ៍នេះ ស្របពេលដែលខ្លួនកំពុងមានបញ្ហាពាក់ព័ន្ធនឹងគ្រូបង្វឹកយ៉ាងណាក្តី៕
អត្ថបទ៖ ខន មេសា Credit: BTV
Juventus៖ លោក Maurizio Sarri កំពុងជួបប្រទះជំងឺរលាកសួតមុនបើករដូវកាល Serie A
អត្ថបទទាក់ទង
