ក្លិប Manchester United កំពុងតែស្ថិតយ៉ាងប្រកៀកក្នុងការបំពេញការនាំយកខ្សែបម្រើ Bruno Fernandes ពីក្លិប Sporting Lisbon។

ក្លិបមានមូលដ្ឋាននៅ Old Trafford មួយនេះ កំពុងតែធ្វើការចរចាជាមួយនឹងក្លិប Sporting ក្នុងពេលបើកទីផ្សារដោះដូរកីឡាករនៅខែនេះ ប៉ុន្តែ បដិសេធក្នុងការផ្តល់តម្លៃខ្លួនតាមការស្នើសុំចំនួន៨០លានអឺរ៉ូ (ស្មើនឹង៦៨លានផោន)។

ប៉ុន្តែ ការចរចាប្រកបដោយផ្លែផ្កាមួយកាលពីថ្ងៃអង្គារ បានធ្វើឲ្យ Man United មានការជឿជាក់ក្នុងការឈានដល់ការព្រមព្រៀងគ្នាមួយជាមួយនឹងកីឡាករវ័យ២៥ឆ្នាំរូបនេះ។

តម្លៃខ្លួនគោលនឹងមានចំនួនប្រមាណជា៥៥លានអឺរ៉ូ (ស្មើនឹង៤៧លានផោន ឬ៦០,៦លានដុល្លារអាមេរិក) ប៉ុន្តែ បើបូកទាំងប្រាក់ឧបត្ថម្ភផ្សេងៗ តម្លៃខ្លួនអាចនឹងកើនឡើងសរុប៨០លានអឺរ៉ូ។ ប្រសិនបើការផ្ទេរនេះ ទទួលបានជោគជ័យ វានឹងក្លាយជាការផ្ទេរដ៏ធំបំផុតនៅខែមករានេះ ក្នុងក្របខ័ណ្ឌ Premier League។

លោក Ole Gunnar Solskjaer អ្នកចាត់ការទូទៅរបស់ក្លិប Man United យកខ្សែបម្រើជាតំបន់អាទិភាព ក្នុងការពង្រឹង នៅខែនេះ។ Fernandes បានស៊ុតបាល់បញ្ចូលទី៦៤គ្រាប់ក្នុងការប្រកួត១៣៧លើក​ ក្នុងរាល់យុទ្ធនាការទាំងអស់ និងបានឈ្នះពាន Portuguese Cup ជាមួយនឹងក្លិប Sporting នៅរដូវកាលឆ្នាំ២០១៨-២០១៩។

រូបគេក៏ជាប់ជាកីឡាករឆ្នើមប្រចាំឆ្នាំរបស់ក្របខ័ណ្ឌ Primeira Liga ក្នុងរដូវកាលឆ្នាំ២០១៧-២០១៨ និង២០១៨-២០១៩ ផងដែរ៕

ប្រភពព័ត៌មាន៖ BBC