ខ្សែប្រយុទ្ធ Sadio Mane បានជួយឲ្យក្រុម Liverpool រក្សាក្តីសង្ឃឹមនៃការបង្កើតកំណត់ត្រាថ្មីក្នុងក្របខ័ណ្ឌ Premier League ខណៈដែលក្រុមម្ចាស់ជើងឯកមួយនេះ បានផ្តួលក្រុម Aston Villa ក្នុងលទ្ធផល ២-០ ដើម្បីរក្សាការនាំមុខ២៣ពិន្ទុដាច់លើក្រុមឈរលេខ២ Manchester City ដែលបានរងបរាជ័យ ១-០ នៅលើទឹកដីក្រុម Southampton កាលពីថ្ងៃអាទិត្យ។
ត្រឹមតែរយៈ៤ថ្ងៃ ក្រោយពីក្រុម Man City បានផ្តួលក្រុម Liverpool ៤-០ ដើម្បីបង្ហាញពីសញ្ញាមួយសម្រាប់ការប្រជែងពាននៅរដូវកាលក្រោយ ក្រុមទាំង២ បានបង្ហាញពីភាពខុសគ្នារវាងក្រុមទាំង២ ក្នុងពេលដែលក្រុម Liverpool ឈ្នះពានរង្វាន់លីកជាលើកដំបូងរបស់ខ្លួនក្នុងរយៈពេល៣០ឆ្នាំ។ Liverpool មិនបានបង្ហាញពីទម្រង់លេងក្នុងកម្រិតកំពូលរបស់ខ្លួនឡើយនៅតង់ទី១ នាកីឡដ្ឋាន Anfield ក្នុងនាមជាម្ចាស់ជើងឯក ប៉ុន្តែ នៅតែអាចដណ្តើមបាន៣ពិន្ទុ ក្នុងទម្លាប់មួយដែលពួកគេតែងតែបានធ្វើក្នុងរយៈពេល២០នាទីចុងក្រោយ។ ជ័យជម្នះនេះ ធ្វើឲ្យ Liverpool មាន៨៩ពិន្ទុ ហើយពួកគេត្រូវការជ័យជម្នះត្រឹមតែ៤លើកទៀតប៉ុណ្ណោះ ពីការប្រកួតដែលនៅសល់៥លើកចុងក្រោយ ដើម្បីបំបែកកំណត់ត្រានៃការរកបាន១០០ពិន្ទុរបស់ក្រុម Man City កាលពីរដូវកាលឆ្នាំ២០១៧-២០១៨។
លោក Klopp បានឲ្យដឹងថា៖ «យើងកំពុងតែស្ថិតក្នុងទីតាំងរបស់យើងហើយ ពីព្រោះយើងឈ្នះក្នុងការប្រកួតដ៏លំបាក»៕
វីដេអូ៖ Highlight
ប្រភពព័ត៌មាន៖ Channel News Asia
