គ្រូបង្គោល និងក្រុមការងារបច្ចេសកទេសរបស់ក្រុមបាល់ទាត់ជម្រើសជាតិកម្ពុជា អាយុក្រោម១៩ឆ្នាំ នៃសហព័ន្ធកីឡាបាល់ទាត់កម្ពុជា នឹងធ្វើតេស្ត ជ្រើសរើសកីឡាករវ័យក្មេង ដែលមានសមត្ថភាពពិតប្រាកដ សម្រាប់ត្រៀមចេញទៅប្រកួតពានរង្វាន់ AFC U19 Championship 2020 នៅប្រទេសអ៊ូសបេគីស្ថាន។
កីឡាករវ័យក្មេងមានអាយុក្រោម១៩ឆ្នាំ ចំនួន៣៨នាក់ ក្នុងនោះក៏មានខ្សែប្រយុទ្ធលេចធ្លោរជាងគេ សៀង ចន្ធា របស់ក្លិបបឹងកេត ផងដែរ គឺត្រូវបានសហព័ន្ធកីឡាបាល់ទាត់កម្ពុជា កោះហៅឲ្យមកធ្វើតេស្ត នៅពហុកីឡដ្ឋាន នារសៀលម៉ោង៤ ថ្ងៃអង្គារនេះ ដើម្បីរកអ្នកមានសមត្ថភាព សម្រាប់ចូលរួមជាមួយក្រុមU19ជម្រើសជាតិកម្ពុជា ដើម្បីត្រៀមខ្លួនក្នុងយុទ្ធនាការមួយនេះ។
បើទោះបីជា នៅពេលនេះ សហព័ន្ធ ក៏ដូចជាគ្រូបង្គោល និងក្រុមបច្ចេកទេសនៃក្រុមU19ជម្រើសជាតិកម្ពុជា នៅមិនទាន់បានប្រាប់ពីលក្ខខណ្ឌនៃការធ្វើតេស្តនេះ ប៉ុន្តែតាមច្បាប់នៃការប្រកួតពានរង្វាន់ AFC U19 Championship នេះ គឺមានតែកីឡាករ២៣នាក់ប៉ុណ្ណោះ នឹងត្រូវបានអនុញ្ញាតឲ្យចូលលេង តំណាងឲ្យប្រទេសនីមួយៗ សម្រាប់ការធ្វើដំណើរទៅចូលរួមព្រឹត្តិការណ៍នេះ។
គួរបញ្ជាក់ថា តាមរយៈការចាប់ឆ្នោត ក្នុងវគ្គ១៦ក្រុម ឬជុំផ្តាច់ព្រ័ត្រ នៃពាន AFC U19 Championship 2020 នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃព្រហស្បតិ៍ ទី១៨ ខែមិថុនា កន្លងមកនេះ ក្រុមU19ជម្រើសជាតិកម្ពុជា បានឈរនៅពូលA ជាមួយក្រុមម្ចាស់ផ្ទះ អ៊ូសបេគីស្ថាន ឥណ្ឌូនេស៊ី និងអ៊ីរ៉ង់។
តាមកាលវិភាគនៃការប្រកួត គឺក្រុមកម្ពុជា នឹងត្រូវប្រកួតលើកឆាកជាមួយក្រុមឥណ្ឌូនេស៊ី នៅថ្ងៃទី១៤ ខែតុលា មុនទៅជួបក្រុមម្ចាស់ផ្ទះអ៊ូសបេគីស្ថាន នៅថ្ងៃទី១៧ និងចុងក្រោយត្រូវប៉ះក្រុមអ៊ីរ៉ង់ នៅថ្ងៃទី២០ ខែតុលា អ៊ីចឹងមានន័យថា ក្រុមU19កម្ពុជា នៅមានពេលវេលាច្រើនទៀត ក្នុងការហ្វឹកហាត់ពង្រឹងសមត្ថភាពបន្ថែម ខណៈការបានឡើងមកលេងដល់វគ្គ១៦ក្រុមនេះ គឺជាការបំបែកកំណត់ត្រាប្រវត្តិសាស្រ្តរបស់ក្រុមជំទង់គោព្រៃ ក្រោយពួកគេ បានរង់ចាំអស់រយៈពេល៤៥ឆ្នាំ៕
