ក្រុមបឹងកេត បានក្លាយជាក្រុមតែមួយគត់ ដែលរក្សាបានកំណត់ត្រាមិនស្គាល់ការចាញ់សោះ សម្រាប់ការប្រកួតជើងទី១ នៃលីកកំពូលកម្ពុជា ឆ្នាំ២០២០ បន្ទាប់ពីពួកគេ បានយកឈ្នះក្រុមខ្លាំង ព្រះខ័នរាជស្វាយរៀង ៤-២ កាលពីយប់ថ្ងៃអាទិត្យ ម្សិលមិញ ចំណែកក្រុមកងយោធពលខេមរភូមិន្ទ (ទ័ព) ទទួលបានជោគជ័យ លើសពីផែនការ ដែលបានដាក់ចេញ ក្នុងការប្រជែងឡើងទីតំបន់ Top6 ប៉ុន្តែក្រុមអង្គរថាយហ្គឺរ បានក្លាយជាក្រុមដែលទទួលបានការខកចិត្តផ្ទួនៗ នៅក្នុងរដូវកាលនេះ។
សម្រាប់ការប្រកួតនៅកីឡដ្ឋានស្វាយរៀង កាលពីយប់ថ្ងៃអាទិត្យនោះ ក្រុមម្ចាស់ផ្ទះ ស្វាយរៀង បានព្យាយាមដាក់សម្ពាធក្រុមភ្ញៀវ បឹងកេត ច្រើន ប៉ុន្តែការវាយបកលឿនៗរបស់បឹងកេត បានផ្តល់ឱកាសឲ្យកីឡាករពាក់លេខ៥០ Gopane Mothusi និង ម៉ាត់ នូរុណ រកបានម្នាក់១គ្រាប់ នៅនាទីទី២៣ និងទី៣៩ ដើម្បីបញ្ចប់ការប្រកួតតង់ទី១ ជាមួយការនាំមុខ ២-០។
ឈានចូលតង់ទី២ ខ្សែប្រយយុទ្ធឆ្នើមវ័យក្មេង សៀង ចន្ធា បានបន្ថែម១គ្រាប់ទៀតឲ្យបឹងកេត នៅនាទីទី៤៩ នៅមុនពេលកីឡាករជប៉ុនពាក់លេខ២០ Kobayashi រកបានគ្រាប់បាល់បើកឆាកឲ្យ ក្រុមខស្វាយរៀង នៅនាទីទី៦៦ ហើយខ្សែប្រយុទ្ធពាក់លេខ១០ Privat បានបន្ថែម១គ្រាប់ទៀត នៅនាទីទី៨៦ គឺក្រោយពេលរូបគេស៊ុតបាល់ពិន័យ១១ម៉ែន មិនបានសម្រេច។
យ៉ាងណាក៏ដោយ ការព្យាយាមវាយសម្រុករបស់ក្រុមស្វាយរៀង នៅចុងម៉ោង បានផ្តល់ឱកាសឲ្យ ម៉ាត់ នូរុណ រកឃើញគ្រាប់បាល់ទី២របស់ខ្លួន នៅនាទីទី ៩០+៨ ខណៈខ្សែការពាររបស់ស្វាយរៀង បានទាត់បាល់ភ្លាត់ថយក្រោយ ស្របពេលអ្នកចាំទី អាំ សុវណ្ណារ៉ាត់ ក៏បានឡើងទៅជួយតែតបាល់ ពីការលើកបាល់ចេញពីជ្រុងដែរនោះ ហើយជ័យជម្នះនេះ បានជួយឲ្យ បឹងកេត ទទួលបានជោគជ័យ ក្នុងការដណ្តើមបានលេខ១ ពីក្រុមស្វាយរៀង នៅក្នុងជើងទី១នេះ។
ចំណែកក្រុទ័ព ដែលមានផែនការ ដណ្តើមបានត្រឹមលេខ៦នោះ បែរជាអាចហក់ឡើងទៅឈរនៅលេខ៤ យ៉ាងរំភើប សម្រាប់ការបញ្ចប់ការប្រកួតជើងទី១នេះ ហើយការទទួលបានជោគជ័យ លើសផែនការរបស់ក្រុមទ័ព បន្ទាប់ពីពួកគេ បានយកឈ្នះក្រុមអគ្គិសនីកម្ពុជា ៤-២ ស្របពេលពេលក្រុមណាហ្គាវើល បានត្រឹមស្មើ ១-១ ជាមួយក្រុមវិសាខា នោះ ខណៈគ្រាប់បាល់តាមស្មើរបស់ វិសាខា បានកើតមានឡើង នៅក្នុងនាទីទី ៩០+៤ ដែលរកបានដោយខ្សែប្រយុទ្ធ Mihaljevic Filip គឺក្រោយពេល ឡេង មករា បានជួយឲ្យ ណាហ្គាវើល នាំមុខ តាំងពីនាទីទី៥៧។
ចំណែកក្រុមភ្នំពេញក្រោន ដែលបានបញ្ចប់ការប្រកួតជាមួយការឈ្នះ៦ ស្មើ៤ និងចាញ់២ប្រកួតនោះ បានឈរនៅលេខ៥ ដោយមាន២២ពិន្ទុស្មើជាមួយក្រុមណាហ្គាវើល ហើយតាមរយៈលទ្ធផលនៅជើងទី១នេះ គឺក្រុមបឹងកេត ស្វាយរៀង វិសាខា ទ័ព ភ្នំពេញក្រោន និងណាហ្គាវើល ដែលបានឈរនៅតំបន់ Top6 សុទ្ធតែមានសិទ្ធិ បានប្រកួតប្រជែងយកពាន នៅជើងទី២។
ផ្ទុយពីនេះ ក្រុមអង្គរថាយហ្គឺរ ដែលធ្លាប់ឈរនៅលេខរៀងទី២នោះ បានផ្ទាត់ចេញពី Top6 និងសល់ត្រឹមការប្រកួតធម្មតា ដើម្បីដណ្តើមយកលេខរៀងពីលេខ៧ ដល់លេខ១៣ នៅក្នុងការប្រកួតជើងទី២ ជាមួយក្រុមចំនួន៦ទៀត ហើយក្រៅពីការបាត់បង់ឱកាសដ៏ធំនេះ អង្គរថាយហ្គឺរ ក៏បានធ្លាក់ចេញពីការប្រកួតពានរង្វាន់សម្តេចហ៊ុន សែន ឆ្នាំ២០២០ ត្រឹមវគ្គ១៦ក្រុមចុងក្រោយផងដែរ ខណៈពួកគេ បានចាញ់ក្រុមយុវជនវិសាខា ដែលលេងតំណាងឲ្យក្រុមខេត្តព្រៃវែង ជាមួយការចាញ់ ៣-២ នៅជើងទី១ និងស្មើគ្នា ២-២ នៅជើងទី២នោះ៕
