បរទេស៖ ក្លិប Paris Saint-Germain កាលពីថ្ងៃព្រហស្បតិ៍ បានប្រកាសពីករណីវិជ្ជមានថ្មីនៃវីរុសកូរ៉ូណាចំនួន៣នាក់ផ្សេងទៀតក្នុងក្រុមរបស់ខ្លួន ពោលគឺត្រឹមតែរយៈពេល១ថ្ងៃ ក្រោយពី Neymar និងមិត្តរួមក្រុម២នាក់ទៀត ត្រូវបានប្រកាសថា បានឆ្លងវីរុសដ៏គ្រោះថ្នាក់នេះ ដែលនាំឲ្យមានភាពមិនច្បាស់ជុំវិញការចាប់ផ្តើមរដូវកាលរបស់ពួកគេ ក្នុងប្រទេសបារាំង។
ស្របពេលចំនួនឆ្លងសរុបកើនដល់៦នាក់ ក្រុមម្ចាស់ជើងឯករបស់បារាំងមួយនេះ បានសរសេរនៅលើបណ្តាញសង្គម Twitter ថា៖ «ការធ្វើតេស្តរកវីរុសកូវីដ-១៩ នាពេលថ្មីៗនេះ ដែលត្រូវបានធ្វើឡើងទៅលើបុគ្គលិករបស់ក្លិប Paris Saint-Germain បានរកឃើញថា មានករណីវិជ្ជមាន៣នាក់ផ្សេងទៀត»។ កីឡាករ Neymar, Angel Di Maria និង Leandro Paredes គឺជាសមាជិក៣នាក់ដំបូងគេដែលបានតេស្តឃើញលទ្ធផលជាវិជ្ជមាន ក្រោយពីបានទៅសម្រាកលំហែរនៅកោះរបស់អេស្ប៉ាញ Ibiza។ អត្តសញ្ញាណរបស់អ្នកឆ្លង ត្រូវបានបញ្ជាក់ប្រាប់បណ្តាញសារព័ត៌មាន ពីប្រភពជិតស្និទ្ធិមួយ ទៅនឹងកីឡាករ ដែលបានស្នើសុំមិនបញ្ចេញឈ្មោះ ដោយសារតែហេតុផល ការរក្សាការសម្ងាត់របស់គ្រូពេទ្យស្តីពីអ្នកជំងឺ។
កាសែតកីឡាប្រចាំថ្ងៃរបស់បារាំង L’Equipe បានចេញផ្សាយថា ខ្សែការពារអន្តរជាតិប្រេស៊ីល Marquinhos ខ្សែប្រយុទ្ធអាហ្សង់ទីន Mauro Icardi និងអ្នកចាំទី Keylor Navas ដែលបានទៅសម្រាកលំហែរនៅកោះ Ibiza ដែរនោះ គឺជាករណីវិជ្ជមានថ្មី៕
ប្រភពព័ត៌មាន៖ Channel News Asia
