បរទេស៖ Neymar បានបង្កើតឲ្យមានការចាប់អារម្មណ៍មួយ នៅពេលដែលរូបគេបានបញ្ជាក់ថា រូបគេចង់លេងជាដៃគូជាមួយនឹងខ្សែប្រយុទ្ធ Lionel Messi ម្តងទៀតនៅរដូវកាលក្រោយ។
តារាឆ្នើមរូបនេះ បានលើកឡើងបែបនេះភ្លាមៗ ក្រោយពីបានជួយឲ្យក្រុម Paris St-Germain ដណ្តើមបានជ័យជម្នះក្នុងលទ្ធផល ៣-១ លើក្រុម Manchester United ក្នុងការប្រកួតក្របខ័ណ្ឌ Champions League កាលពីថ្ងៃពុធ។ Neymar បានប្រាប់ទូរទស្សន៍ ESPN អំពីអតីតមិត្តរួមក្រុមរបស់គេនៅក្លិប Barcelona ថា៖ «អ្វីដែលខ្ញុំច់បានបំផុតគឺការលេងជាមួយនឹង Messi ម្តងទៀត និងអាចលេងទាំងរីករាយជាមួយនឹងរូបគេម្តងទៀតនៅលើទីលាន»។ ខ្សែប្រយុទ្ធអន្តរជាតិប្រេស៊ីលរូបនេះបានបន្ថែមទៀតថា៖ «រូបគេអាចលេងនៅកន្លែងរបស់ខ្ញុំ ខ្ញុំគ្មានបញ្ហាជាមួយនឹងករណីនោះឡើយ។ ប៉ុន្តែ ខ្ញុំចង់លេងជាដៃគូជាមួយនឹងរូបគេនៅឆ្នាំក្រោយ។ យើងត្រូវតែធ្វើឲ្យបាននៅរដូវកាលក្រយោ»។
ការលើកឡើងបែបនេះ បានកើតឡើង ខណៈដែលលោក Carlos Tusquets ប្រធានស្តីទីរបស់ក្លិប Barcelona បានបញ្ជាក់ថា ក្លិបនេះ គួរតែបានលក់ Messi កាលពីរដូវក្តៅមុន។ ខ្សែប្រយុទ្ធអន្តរជាតិអាហ្សង់ទីន Messi វ័យ៣៣ឆ្នាំ បានប្រាប់ក្លិប Barcelona កាលពីមុនថា រូបគេចង់ចាកចេញ ប៉ុន្តែ បានបញ្ជាក់ថា លក្ខខណ្ឌក្នុងកិច្ចសន្យារបស់គេ មានន័យថា រូបគេមិនអាចធ្វើបែបននោះបានឡើយ៕
ប្រភពព័ត៌មាន៖ BBC
