បរទេស៖ ខ្សែប្រយុទ្ធ Cristiano Ronaldo បានស៊ុតបាល់បញ្ចូលទី២គ្រាប់ ខណៈដែលក្រុមម្ចាស់ជើងឯក Juventus បានស្តារមុខមាត់ពីការរងបរាជ័យជាលើកដំបូងរបស់ខ្លួនក្នុងក្របខ័ណ្ឌ Serie A នៅរដូវកាលនេះ តាមរយៈការផ្តួលក្រុម Udines ក្នុងលទ្ធផល ៤-១ កាលពីថ្ងៃអាទិត្យ ដើម្បីឡើងទៅឈរក្នុងចំណាត់ថ្នាក់លេខ៥។
ក្លិបមានមូលដ្ឋាននៅទីក្រុង Milan កំពុងតែនាំមុលើកំពូលតារាងលីក ខណៈដែលក្រុម Juventus ដេញតាមពីក្រោយ១០ពិន្ទុ ជាមួយនឹងការសល់១ប្រកួតក្នុងដៃ។ ក្រុមកំពុងនាំមុខ AC Milan បនារក្សាការនាំមុខ១ពិន្ទុលើក្រុម Inter ក្រោយពីបានយកឈ្នះក្នុងលទ្ធផល ២-០ លើក្រុម Benevento បើទោះបីបានលេងការប្រកួតជាមួយនឹងសមាជិក១០នាក់រយៈពេល១ម៉ោងក៏ដោយ។ ដោយឡែក ក្រុម Inter បានបន្ថែមកំណត់ត្រាឈ្នះជាប់ៗគ្នារបស់ខ្លួនរហូតដល់៨ប្រកួត តាមរយៈការដណ្តើមបានជ័យជម្នះក្នុងលទ្ធផល ៦-២ លើក្រុម Crotone ខណៈដែល Lautaro Martinez បានស៊ុតបាល់បញ្ចូលទី៣គ្រាប់។
លោក Stefano Pioli ដែលក្រុមរបស់លោកមិនស្គាល់ចាញ់សោះក្នុងចំណោមការប្រកួតលីក២៧លើក បើគិតចាប់តាំងពីខែមីនានោះ បានឲ្យដឹងថា៖ «យើងមិនបានធ្វើឲ្យខ្លួនយើងធ្លាក់ចូលក្នុងសម្ពាធដោយសារតែលទ្ធផលពីគូប្រកួតរបស់យើងឡើយ។ យើងមានមហិច្ឆតា យើងមិនលាក់បាំងមហិច្ឆតានោះ ហើយយើងក៏មានបំណងឈ្នះការប្រកួតបន្ទាប់ពេលប៉ះក្រុម Juventus ផងដែរ»៕
ប្រភពព័ត៌មាន៖ Channel News Asia
