បរទេស៖ ខ្សែបម្រើប្រយុទ្ធ Christian Eriksen រកបានគ្រាប់បាល់ឈ្នះនៅជិតបញ្ចប់ការប្រកួត ខណៈដែលក្រុម Inter Milan បានឈានទៅប្រកួតដណ្តើមពាន Italian Cup វគ្គពាក់កណ្តាលផ្តាច់ព្រ័ត្រ កាលពីថ្ងៃអង្គារ តាមរយៈការដណ្តើមបានជ័យជម្នះក្នុងលទ្ធផល ២-១ លើក្រុម AC Milan ក្នុងការប្រកួតរវាងក្រុមស្ថិតក្នុងទីក្រុងតែដ៏តានតឹងបំផុត។
ការប្រកួតវគ្គ៨ក្រុមចុងក្រោយ នៅកីឡដ្ឋាន San Siro ត្រូវបានធ្វើឲ្យមានភាពចម្រូងចម្រាស់ ដោយសារតែជម្លោះរវាងតារាឆ្នើម Zlatan Ibrahimovic និង Romelu Lukaku ដែលសុទ្ធសឹងរកបានគ្រាប់បាល់ដូចគ្នានៅរាត្រីនោះ ខណៈដែលក្រោយមក Zlatan បានរងពិន័យកាតក្រហម នៅតង់ទី២។ ភាពតានតឹងបានស្ថិតក្នុងកម្រិតដ៏ខ្ពស់ ខណៈដែល Lukaku បានខកខានឱកាសក្នុងការជួយឲ្យ Inter រកបានគ្រាប់បាល់មុននៅនាទី ទី២០ ដោយសារតែអ្នកចាំទី Ciprian Tatarusanu របស់ AC Milan បានសង្គ្រោះបាល់ដោយជើងរបស់គេ។ បន្ទាប់មក Ibrahimovic និង Lukaku ដែលជាអតីតមិត្តរួមក្រុមនៅក្លិប Manchester United បានប៉ះទង្គិចគ្នាយ៉ាងខឹងសម្បារ នៅមុនពេលបញ្ចប់តង់ទី១។
Ibrahimovic បានប្រើពាក្យសម្តីមិនសមរម្យទៅលើ Lukaku និងបានធ្វើឲ្យតារាឆ្នើមអន្តរជាតិបែលហ្ស៊ិករូបនេះផ្ទុះកំហឹង តាមរយៈការសើចនៅចំមុខរបស់គេ ខណៈដែលកីឡាករទាំង២ បានយកក្បាលទល់គ្នា។ លោក Stefano Pioli គ្រូបង្វឹករបស់ AC Milan បានឲ្យដឹងថា៖ «ការពិន័យកាតលឿងសម្រាប់ជម្លោះជាមួយនឹង Lukaku បាននាំឲ្យ Ibrahimovic រងពិន័យកាតក្រហម»៕
ប្រភពព័ត៌មាន៖ Channel News Asia