បរទេស៖ ក្រុម Manchester City បានកំណត់ត្រាគោលដៅរបស់ខ្លួនក្នុងការឈ្នះពាន៤សំខាន់ៗ នៅពេលដែលក្រុមកំពុងតែនាំមុខដាច់លើកំពូលតារាងក្របខ័ណ្ឌ Premier League ត្រៀមទទួលធ្វើជាម្ចាស់ផ្ទះក្រុមឡើងទម្រង់លេង West Ham នៅចុងសប្តាហ៍នេះ។ ជាមួយគ្នានេះ ដើម្បីមានឱកាសធ្វើឲ្យក្រុម Man City ធ្លាក់ចូលក្នុងសម្ពាធ ក្រុមឈរលេខ២ Manchester United ត្រូវតែបញ្ចប់កំណត់ត្រាមិនស្គាល់ចាញ់របស់លោក Thomas Tuchel ក្នុងនាមជាអ្នកការទូទៅរបស់ក្រុមតោខៀវ។
Man City ត្រៀមបង្ហាញសាច់ដុំពេលប៉ះ West Ham
ការធ្វើដំណើររបស់ក្រុម Manchester City ឆ្ពោះទៅកាន់ការឈរលើកំពូលតារាងនៃក្របខ័ណ្ឌ Premier League មិនមែនជារឿងដ៏គួរឲ្យភ្ញាក់ផ្អើលឡើយ បើយើងគិតដល់កំណត់ត្រានៃការឈ្នះពានរបស់ពួកគេ ប៉ុន្តែ ការបំបែកកំណត់ត្រាឈ្នះជាប់ៗគ្នារបស់ពួកគេ បានជួយឲ្យពួកគេមានការជឿជាក់ថា ពួកគេអាចសម្រេចបានសមិទ្ធផលដ៏ធំបំផុត។ Man City បានកត់ត្រាជ័យជម្នះជាលើកទី១៩ជាប់ៗគ្នាក្នុងរាល់យុទ្ធនាការទាំងអស់ ដែលជាកំណត់ត្រាមួយសម្រាប់ក្លិបស្ថិតក្នុងក្របខ័ណ្ឌកំពូលរបស់អង់គ្លេស ក្រោយពីពួកគេបានផ្តួលក្រុម Borussia Monchengladbach ២-០ ក្នុងក្របខ័ណ្ឌ Champions League វគ្គ១៦ក្រុមចុងក្រោយ កាលពីថ្ងៃពុធ។ ក្រុមរបស់លោក Pep Guardiola កំពុងតែនាំមុខ១០ពិន្ទុដាច់ លើកំពូលតារាង Premier League ក៏នឹងត្រូវប៉ះក្រុម Tottenham ក្នុងការប្រកួតដណ្តើមពាន League Cup វគ្គផ្តាច់ព្រ័ត្រ ហើយក៏បានឈានទៅប្រកួតពាន FA Cup វគ្គ៨ក្រុមចុងក្រោយផងដែរ។
Man Utd នឹងត្រូវល្បងសមត្ថភាពពេលប៉ះក្រុម Tuchel
ក្រុម Manchester United គឺជាគូប្រកួតដែលដេញតាមពីក្រោយក្រុម Manchester City ប្រកៀកជាងគេ ប៉ុន្តែ ក្រុមរបស់លោក Ole Gunnar Solskjaer នឹងត្រូវការឲ្យក្រុម Man City ភ្លាត់ស្នៀតយ៉ាងគំហុក ប្រសិនបើពួកគេចង់ឈ្នះពានជាលើកទី១ បើគិតចាប់តាំងពីឆ្នាំ២០១៣។ ការដណ្តើមបានជ័យជម្នះលើទឹកដីក្រុម Chelsea នៅរាត្រីថ្ងៃអាទិត្យ ពិតជាសំខាន់ណាស់ក្នុងការជួយរក្សាក្តីសង្ឃឹមរបស់ក្រុម Man United។ ប៉ុន្តែ ការដណ្តើមបានជ័យជម្នះ នឹងមិនងាយស្រួលឡើយ ដោយសារតែក្រុម Chelsea កំពុងតែស្ថិតក្រោមការដឹកនាំរបស់អតីតគ្រូបង្វឹកនៃក្លិប Paris Saint-Germain លោក Thomas Tuchel។ បើគិតចាប់តាំងពីចូលជំនួសកន្លែងរបស់លោក Frank Lampard កាលពីខែមករា លោក Tuchel បានឈ្នះការប្រកួត៦លើកក្នុងចំណោមការប្រកួត៨លើករបស់លោក ក្នុងរាល់យុទ្ធនាការទាំងអស់ ដើម្បីជួយឲ្យក្រុម Chelsea ឡើងឈរលេខ៥។ ប៉ុន្តែ ក្រុម Man United មិនស្គាល់ចាញ់សោះក្នុងចំណោមការប្រកួតលីក៦លើក ហើយខ្សែប្រយុទ្ធរបស់ពួកគេគឺ Marcus Rashford ជឿជាក់ថា ក្រុមខ្លួនកំពុងតែក្លាយជាក្រុមដ៏ខ្លាំងមួយ។ ខ្សែប្រយុទ្ធរូបនេះបានឲ្យដឹងថា៖ «ខ្ញុំគិតថា យើងទាំងអស់គ្នា បាននិយាយពេញ១រដូវកាលថា យើងគឺជាក្រុមមួយដែលនៅតែត្រូវការការអភិវឌ្ឍទៀត រៀនមេរៀនបន្ថែមទៀតអំពីខ្លួនយើង រាល់ការប្រកួតទាំងអស់»៕
ប្រភពព័ត៌មាន៖ AFP
