បរទេស៖ ក្រុម Real Madrid បានគេចផុតពីការធ្លាក់ចេញពីក្របខ័ណ្ឌ Champions League កាលពីថ្ងៃអង្គារ តាមរយៈការផ្តួលក្រុម Atalanta ក្នុងលទ្ធផល ៣-១ ដើម្បីឈ្នះទាំង២ជើង ៤-១ និងឈានទៅវគ្គ៨ក្រុមចុងក្រោយជាលើកទី១ក្នុងរយៈពេល៣ឆ្នាំ។
ខ្សែការពារ Sergio Ramos បានអបអរការវិលចូលលេងវិញពីបញ្ហារបួសរបស់គេ តាមរយៈការស៊ុតបាល់ប៉េណាល់ទី១គ្រាប់ ក្រោយពីខ្សែប្រយុទ្ធ Karim Benzema បានបន្តភាពមុតស្រួចរបស់គេក្នុងតំបន់ប្រយុទ្ធ តាមរយៈការដណ្តើមយកប្រៀបពីការប្រព្រឹត្តកំហុសរបស់អ្នកចាំទី Marco Sportiello ដើម្បីស៊ុតបាល់បំប៉ោងសំណាញ់ទី។ Luis Muriel បានរកគ្រាប់បាល់បាន១គ្រាប់វិញសម្រាប់ក្រុមភ្ញៀវ ប៉ុន្តែ ក្តីសង្ឃឹមនៃការវាយបកវិញរបស់ពួកគេ បានបញ្ចប់នៅពេលដែល Marco Asensio រកបានគ្រាប់បាល់ទី៣សម្រាប់ក្រុម Real Madrid។
ស្របពេលជាមួយគ្នានេះ ក្រុម Manchester City បានឈានទៅវគ្គ៨ក្រុមចុងក្រោយនៃក្របខ័ណ្ឌ Champions League ដោយងាយ ខណៈដែលគ្រាប់បាល់ស៊ុតបញ្ចូលទីនៅដើមតង់របស់កីឡាករ Kevin De Bruyne និង Ilkay Gundogan បានជួយឲ្យពួកគេផ្តួលក្រុម Borussia Moenchengladbach ក្នុងលទ្ធផល ២-០ ក្នុងទីក្រុង Budapest កាលពីថ្ងៃអង្គារ និងដើម្បីឈ្នះទាំង២ជើង ៤-០៕
ប្រភពព័ត៌មាន៖ Channel News Asia
