បរទេស៖ក្លឹបបិសាចក្រហម Manchester United កំពុងប្រឈមនឹងការកាត់ពិន្ទុ បន្ទាប់ពីអ្នកគាំទ្របានចូលអុកឡុកបង្កការរំខានដែលធ្វើអោយប៉ះពាល់ដល់ការការប្រកួតលីគកំពូលអង់គ្លេសរវាងក្រុមម្ចាស់ផ្ទះ Man Utd និងក្រុមភ្ញៀវ Liverpool នៅសប្តាហ៏ទី៣៤កាលពីយប់ថ្ងៃអាទិត្យ។
ពេលនេះទាំងក្របខ័ណ្ឌ Premier League និងសមាគមបាល់ទាត់អង់គ្លេស FA ព្រមជាមួយអាជ្ញាធរមូលដ្ឋានកំពុងធ្វើការស៊ើបអង្កេតលើករណីមួយនេះ ដើម្បីអោយក្លឹបត្រូវមានទំនួលខុសត្រូវ ដែលមិនអាចគ្រប់គ្រងស្ថានការណ៏បាន។ ពោលគឺបន្ទាប់ពីអ្នកគាំទ្របានធ្វើការហែក្បួនជាទ្រង់ទ្រាយធំតវ៉ាគោលបំណងប្រឆាំងម្ចាស់ក្លឹបគឺក្រុមគ្រួសារត្រកូល Glazer អោយចាកចេញពីការកាន់ភាគហ៊ុន និងលក់ក្លឹបតែម្តង។ មិនតែប៉ុណ្ណោះសកម្មភាពមួយទៀតគឺអ្នកគាំទ្រច្រើនពាន់នាក់បានបំបែកគ្នាចូលទៅកាន់ទីលាន Old Trafford ដោយដុតភ្លើងពណ៌ពេញទីលាន និងមួយចំនួនទៀតបានទៅរារាំងកីឡាករ និងគ្រូបង្វឹកមិនអោយចាកចេញពីសណ្ឋាគារ Lowry មកកាន់កីឡាដ្ឋានដើម្បីធ្វើការប្រកួត។
ដូច្នេះបើយោងតាមច្បាប់នៃក្របខ័ណ្ឌ Premier League ក្លឹបទាំងអស់ណាដែលដើរតួនាទីជាម្ចាស់ផ្ទះតែមិនធានាបានសុវត្ថិភាពល់កីឡាករទាំងពេលមានវត្តមានចូលដល់កីឡាដ្ឋាន និងវិលត្រលប់ទៅវិញ គឺត្រូវប្រឈមនិងការកាត់ពិន្ទុ។ មួយវិញទៀតបទបញ្ជាផ្ទៃក្នុងរបស់ FA គឺក្លឹបដែលមិនបានអនុវត្តភារកិច្ចខាងលើនេះបាន គឺប្រឈមនិងព្យួរការប្រកួត និងផ្តល់សំណងដល់ភាគីម្ខាងទៀតអាស្រ័យលើទិដ្ឋភាពជាក់ស្តែងដែលបានប្រព្រឹត្តនាំអោយខូចប្រយោជន៏រួមនោះ៕
ប្រភពព័ត៍មាន៖ DailyMail
