បរទេស៖ ខ្សែប្រយុទ្ធ Harry Kane របស់ក្លិប Tottenham បានប្រាប់ក្លិបរបស់ខ្លួនថា រូបគេចង់ចាកចេញនៅចុងរដូវកាលនេះ។ នេះបើយោងទៅតាមប្រភពព័ត៌មាននានាកាលពីថ្ងៃចន្ទ។
បើតាមការចេញផ្សាយរបស់ទូរអស្សន៍ Sky Sports កីឡាករ Kane មិនពេញចិត្តចំពោះការអភិវឌ្ឍមិនបានគ្រប់គ្រងនៅក្នុងក្លិប Tottenham នារដូវកាលនេះឡើយ និងចង់ចាកចេញ ក្រោយពីបានចំណាយពេលអស់រយៈពេល១២ឆ្នាំជាមួយនឹងក្រុមមានមូលដ្ឋាននៅទីក្រុងឡុងដ៍មួយនេះ។ ប្រធានក្រុមនៃក្រុមបាល់ទាត់ជម្រើសជាតិអង់គ្លេសរូបនេះ ចង់ដោះស្រាយរឿងអនាគតរបស់គេ នៅមុនពេលចាប់ផ្តើមការប្រកួតក្នុងព្រឹត្តិការណ៍ Euro ឆ្នាំ២០២០ នាថ្ងៃទី១១ ខែមិថុនា។ កិច្ចសន្យារបស់ Kane ជាមួយនឹងក្លិប Tottenham នៅសល់រយៈពេល១ឆ្នាំទៀត ហើយលោក Daniel Levy ដែលជាប្រធានក្លិប ត្រូវបានគេស្គាល់ថា ជាមនុស្សពិបាកក្នុងការចរចា ខណៈដែលករណីនេះ អាចនឹងបញ្ចប់ក្តីសង្ឃឹមរបស់ Kane វ័យ២៧ឆ្នាំក្នុងការទទួលបានដំណោះស្រាយភ្លាមៗ។
Tottenham បានបដិសេធក្នុងការពិភាក្សាលើអនាគតរបស់ Kane ជាសាធារណៈ ខណៈដែលពួកគេផ្តោតលើការប្រកួត២លើកចុងក្រោយរបស់ពួកគេ ក្នុងក្របខ័ណ្ឌ Premier League ដើម្បីប្រជែងយកកៅអី Europa League។ អ្នកនាំពាក្យម្នាក់របស់ក្លិប បានឲ្យដឹងថា៖ «យើងនឹងមិនធ្វើការបកស្រាយឡើយ។ ការផ្តោតអារម្មណ៍របស់យើងគឺលើការបញ្ចប់រដូវកាលនេះឲ្យបានរឹងមាំបំផុតតាមដែលអាច»៕
ប្រភពព័ត៌មាន៖ Channel News Asia