បរទេស៖ ស្របពេលដែលព្រឹត្តិការណ៍ Euro 2020 នៅឆ្នាំនេះ នឹងត្រូវរៀបចំឡើងនៅក្នុងប្រទេសចំនួន១១ នៅកីឡដ្ឋានទាំង១១ ដូចគ្នា ទូទាំងអឺរ៉ុប ក៏មានការកើនឡើងប្រាក់រង្វាន់សម្រាប់ក្រុមម្ចាស់ជើងឯក ក៏ដូចជាក្រុមដែលឈ្នះសិទ្ធិចូលរួមប្រកួតក្នុងយុទ្ធនាការខាងមុខនេះផដែរ។ ព្រឹត្តិការណ៍កីឡាបាល់ទាត់ទ្វីបអឺរ៉ុបរយៈពេល៤ឆ្នាំម្តងមួយនេះ ដែលនឹងត្រូវប្រព្រឹត្តទៅចាប់ពីថ្ងៃទី១១ ខែមិថុនា ដល់ទី១១ខែកក្កដា ឆ្នាំ២០២១ មានកញ្ចប់ប្រាក់រង្វាន់សរុប ៤៥៦ លានអឺរ៉ូ (ស្មើនឹង555លានដុល្លារអាមេរិក) ហើយបើធៀបទៅនឹងព្រឹត្តិការណ៍ក្នុងឆ្នាំ២០១៦ នៅប្រទេសបារាំង មានតែ៣៣៧លានអឺរ៉ូ ប៉ុណ្ណោះ។
កាលពី5ឆ្នាំមុន ក្រុមដែលចូលរួមប្រកួត ទទួលបានទឹកប្រាក់រង្វាន់ត្រឹមតែ៨លានអឺរ៉ូប៉ុណ្ណោះ (ស្មើនឹង៩,៧៣លានដុល្លារអាមេរិក) ក្នុង១ក្រុម។
ទឹកប្រាក់រង្វាន់សម្រាប់ព្រឹត្តិការណ៍ UEFA Euro 2020 បានកើនរហូតដល់២៤% ដោយក្រុមជើងឯករង នឹងទទួលបាន៧លានអឺរ៉ូ (ស្មើនឹង៨,៥លានដុល្លារអាមេរិក) ខណៈក្រុមម្ចាស់ជើងឯកនឹងទទួលបាន ១០លានអឺរ៉ូ (ស្មើនឹង១២លានដុល្លារអាមេរិក)។
ក្រុមដែលចូលរួមប្រកួតទាំង២៤ មកពីអឺរ៉ុប នឹងទទួលបានប្រាក់រង្វាន់ស្មើៗពីកញ្ចប់ថវិកាសរុបចំនួន ៣៧១លានអឺរ៉ូ ដោយគ្រាន់តែឈ្នះសិទ្ធិចូលរួមប្រកួតក្នុងយុទ្ធនាការ Euro ឆ្នាំ2020 ដែលមានន័យថា ក្រុមនីមួយៗ ដែលឈ្នះកៅអី ទទួលបានប្រាក់រង្វាន់ ៩,២៥ លានអឺរ៉ូដូចគ្នា។
ជាមួយគ្នានេះ ក្រុមដែលឈ្នះរាល់ការប្រកួតទាំងអស់ចាប់ពីវគ្គចែកពូល ដល់វគ្គផ្តាច់ព្រ័ត្រ អាចទទួលបានប្រាក់រង្វាន់សរុបរហូតដល់ទៅ ៣៤លានអឺរ៉ូ ដែលមានន័យថា ការឈ្នះ១ប្រកួត នឹងទទួលបានប្រាក់១,៥លានអឺរ៉ូ និង ៧៥០.០០០ សម្រាប់ការទទួលបានលទ្ធផលស្មើ៕
ការបែងចែកប្រាក់រង្វាន់សម្រាប់ព្រឹត្តិការណ៍ UEFA Euro 2020
| វគ្គ ឬដំណាក់កាល | ប្រាក់រង្វាន់ |
| ឈ្នះសិទ្ធិទៅប្រកួតយុទ្ធនាការនេះ | €9.25 million (ក្រុមទាំង24) |
| វគ្គចែកពូល | €1.5 million (ឈ្នះក្នុង1ប្រកួត) និង €750,000 (លទ្ធផលស្មើ) |
| វគ្គ16ក្រុមចុងក្រោយ | €2 million (16ក្រុម) |
| វគ្គ8ក្រុមចុងក្រោយ | €3.25 million (8ក្រុម) |
| វគ្គពាក់កណ្តាលផ្តាច់ព្រ័ត្រ | €5 Million (4ក្រុម) |
| ក្រុមជើងឯករង | €7 Million |
