បរទេស៖ ក្រុមបាល់ទាត់ជម្រើសជាតិវេលស៍ និងក្រុមមានចំណាត់ថ្នាក់លេខ១ក្នុងពិភពលោក បែលហ្ស៊ិក នឹងចាប់ផ្តើមយុទ្ធនាការ Euro ឆ្នាំ២០២០ នៅរាត្រីនេះ ក្រោយពីយុទ្ធនាការដែលត្រូវបានពន្យារពេលមួយនេះ បានចាប់ផ្តើម ដោយក្រុមជម្រើសជាតិអ៊ីតាលី ដណ្តើមបានជ័យជម្នះយ៉ាងកក់ក្តៅ ក្នុងរាត្រីដ៏រំភើបក្នុងទីក្រុងរ៉ូម។
ក្រោយពីការប្រកួតកីឡាបាល់ទាត់ត្រូវបានរៀបចំឡើងនៅកីឡដ្ឋានដោយគ្មានអ្នកទស្សនាអស់រយៈពេល១ឆ្នាំ ដោយសារតែការឆ្លងរាតត្បាតនៃវីរុសកូវីដ ១៩ កីឡដ្ឋាន Stadio Olimpico មានអ្នកទស្សនាប្រមាណជា១៥%នៃចំនួនដែលអាចផ្ទុកអ្នកទស្សនាសរុប សម្រាប់ការប្រកួតបើកឆាកក្នុងព្រឹត្តិការណ៍ Euro ហើយអ្នកគាំទ្រនក្រុមម្ចាស់ផ្ទះចំនួន១៦០០០នាក់ បានជួបភាពរីករាយដោយក្រុមអ៊ីតាលី ផ្តួល តួកគី ក្នុងលទ្ធផល ៣-០។ ដោយឡែក ក្នុងទីក្រុង Baku ប្រទេសអាស៊ែបៃហ្សង់ អ្នកគាំទ្ររហូតដល់ទៅ៣១០០០នាក់ នឹងត្រូវអនុញ្ញាតឲ្យចូលទស្សនាការប្រកួតគូទី១នៅថ្ងៃសៅរ៍នេះ នៅពេលដែលក្រុមជម្រើសជាតិវេលស៍ ដែលបានឡើងទៅវគ្គពាក់កណ្តាលផ្តាច់ព្រ័ត្រក្នុង Euro ឆ្នាំ២០១៦ នៅបារាំងនោះ ប្រកួតជាមួយនឹងក្រុមជម្រើសជាតិស្វ៊ីស ក្នុងពូល A ខណៈដែល Gareth Bale ធ្វើជាប្រធានក្រុម។
ស្របពេលជាមួយគ្នានេះ បែលហ្ស៊ិក ដែលជាក្រុមមួយក្នុងចំណោមក្រុមកំពូលៗ នឹងត្រូវប៉ះរុស្ស៊ី ក្នុងទីក្រុង Saint-Petersburg ប៉ុន្តែ ក្រុមរបស់លោក Roberto Martinez នឹងលេងដោយគ្មានតារាឆ្នើម Kevin De Bruyne ដែលនៅតែមានរបួសនៅឡើយ ក្រោយពីរងការបាក់ឆ្អឹងច្រមុះ ក្នុងពេលឲ្យក្រុម Manchester City ក្នុង Champions League វគ្គផ្តាច់ព្រ័ត្រ៕
ប្រភពព័ត៌មាន៖ Channel News Asia
