បរទេស៖ កីឡាករ Tomas Holes និង Patrik Schick បានស៊ុតបាល់បញ្ចូលទីដូចគ្នានៅក្នុងតង់ទី២ ដើម្បីជួយឲ្យក្រុមបាល់ទាត់ជម្រើសជាតិសាធារណរដ្ឋឆែក ឈានទៅវគ្គ៨ក្រុមចុងក្រោយនៃព្រឹត្តិការណ៍ Euro 2020 ខណៈដែលពួកគេបានដណ្តើមយកប្រៀបទៅលើរងពិន័យកាតក្រហមរបស់ហូឡង់ ដើម្បីបង្កើតការភ្ញាក់ផ្អើល និងទទួលជ័យជម្នះក្នុងលទ្ធផល ២-០ ក្នុងទីក្រុង Budapest កាលពីថ្ងៃអាទិត្យ។
នេះគឺជាលទ្ធផលដ៏ខកចិត្តមួយសម្រាប់ហូឡង់ ដែលមានភាពទន់ខ្សោយ ក្រោយពីខ្សែការពារ Matthijs de Ligt បានរងពិន័យកាតក្រហម សម្រាប់ការយកដៃប៉ះបាល់នៅនាទី ទី១០ក្នុងតង់ទី២។ ខ្សែការពារ Holes បានឲ្យដឹងថា៖ «ហូឡង់ ជាក្រុមមានក្តីសង្ឃឹមខ្ពស់ក្នុងការឈ្នះការប្រកួតនេះ។ ពិតណាស់ យើងស្ទើរតែមិនជឿខ្លួនឯង ក្រោយពីបានផ្តួលក្នុងលទ្ធផល ២-០ បែបនេះ»។
ស្របពេលជាមួយគ្នានេះ De Ligt បានប្រាប់ទូរទស្សន៍ហូឡង់ថា៖ «យើងបានចាញ់ការប្រកួតនេះ ដោយសារតែទង្វើរបស់ខ្ញុំ។ យើងបានគ្រប់គ្រងការប្រកួតនៅមុនពេលនោះ ហើយខ្ញុំគិតថា ខ្ញុំជាអ្នកទទួលខុសត្រូវ»។ ក្រុមជម្រើសជាតិឆែក បច្ចុប្បន្ន នឹងត្រូវធ្វើដំណើរទៅជួបក្រុមជម្រើសជាតិដាណឺម៉ាក ក្នុងវគ្គ៨ក្រុមចុងក្រោយ ក្នុងទីក្រុង Baku នៅថ្ងៃសៅរ៍ សប្តាហ៍នេះ៕
ប្រភពព័ត៌មាន៖ Channel News Asia
