បរទេស៖ ខ្សែប្រយុទ្ធ Harry Kane ប្រធានក្រុមនៃក្រុមជម្រើសជាតិអង់គ្លេស បាននិយាយថា ក្រុមរបស់គេនឹងមិនបញ្ឈប់ឡើយ ក្រោយពីបានបញ្ចប់សំណាងអាក្រក់អស់រយៈពេលជាយូររបស់ពួកគេពេលប្រកួតជាមួយនឹងក្រុមជម្រើសជាតិអាល្លឺម៉ង់ តាមរយៈការដណ្តើមបានជ័យជម្នះក្នុងលទ្ធផល ២-០ នាកីឡដ្ឋាន Wembley ដើម្បីឡើងទៅវគ្គ៨ក្រុមចុងក្រោយនៃព្រឹត្តិការន៍ Euro ឆ្នាំ២០២០។
Kane បានតែតបាល់បញ្ចូលទីដើម្បីរកគ្រាប់បាល់ជាលើកដំបូងរបស់គេក្នុងយុទ្ធនាការនេះ នៅជិតបញ្ចប់ការប្រកួត ពីមុខអ្នកគាំទ្រដ៏ច្រើនកុះករ ដើម្បីជួយឲ្យអង់គ្លេសឆ្លងផុតវគ្គចាញ់ធ្លាក់ជាលើកដំបូង ក្នុងរយៈពេល២៥ឆ្នាំ នៅក្នុងព្រឹត្តិការណ៍ជើងឯកអឺរ៉ុប។ នេះគឺជាការដណ្តើមបានជ័យជម្នះក្នុងវគ្គចាញ់-ធ្លាក់ជាលើកទី១របស់ពួកគេ លើក្រុមម្ចាស់ជើងឯកពិភពលោក៤សម័យកាលអាល្លឺម៉ង់ បើគិតចាប់តាំងពីបានលើកពាន World Cup លើទឹកដីខ្លួនឯងក្នុងឆ្នាំ១៩៦៦។ Kane បានឲ្យដឹងថា៖ «នេះគឺជាថ្ងៃដ៏អស្ចារ្យ និងជាការប្រកួតដ៏អស្ចារ្យ។ ក្នុងការឮសំឡេងអបអរនាកីឡដ្ឋាន Wembley បែបនេះ គឺជាពេលវេលាដែលយើងមិនអាចបំភ្លេចបាន។ យើងបានបង្ហាញពីកម្រិតលេងយ៉ាងល្អ និងបានការពារមិនឲ្យមានគ្រាប់បាល់ចូលទីម្តងទៀត។ យើងនឹងរីករាយនឹងជ័យជម្នះនេះ ប៉ុន្តែ យើងដឹងថា យើងនឹងមានការប្រកួតដ៏ធំមួយទៀតនៅថ្ងៃសៅរ៍»។
មុននឹងឈានទៅវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ អង់គ្លេស ត្រូវប៉ះជាមួយនឹងក្រុមអ៊ុយក្រែន ក្នុងទីក្រុងរ៉ូមជាមុនសិន នៅថ្ងៃសៅរ៍ ចុងសប្តាហ៍នេះ។ ប្រសិនបើឈ្នះ ពួកគេនឹងឡើងទៅជួបក្រុមជម្រើសជាតិដាណឺម៉ាក ឬសាធារណរដ្ឋឆែក ក្នុងវគ្គ៤ក្រុមចុងក្រោយ៕
ប្រភពព័ត៌មាន៖ Channel News Asia
