បរទេស៖ លោក Roberto Martinez គ្រូបង្វឹកនៃក្រុមបាល់ទាត់ជម្រើសជាតិបែលហ្ស៊ិក បានបញ្ជាក់កាលពីថ្ងៃព្រហស្បតិ៍ថា លោកនឹងសម្រេចចិត្តនៅនាទីចុងក្រោយថា តើនឹងដាក់ឲ្យតារាឆ្នើម Eden Hazard និង Kevin De Bruyne ចូលលេង ឬអត់ ក្នុងការប្រកួតវគ្គ៨ក្រុមចុងក្រោយនៃព្រឹត្តិការណ៍ Euro ឆ្នាំ២០២០ នាចុងសប្តាហ៍នេះ។
ក្រុមរបស់លោក Martinez នឹងត្រូវជួបជើងខ្លាំងអ៊ីតាលី ក្នុងការប្រកួតវគ្គ១/៤ផ្តាច់ព្រ័ត្រ ក្នុងទីក្រុង Munich នៅរាត្រីនេះ ប៉ុន្តែ អាចនឹងអវត្តមាន Hazard ដោយសារតែបញ្ហាសរសៃ និង De Bruyne ដោយសារតែបញ្ហាសរសៃជង្គង់។ លោក Martinez បានបញ្ជាក់ថា៖ «យើងកំពុងតែប្រជែងជាមួយនឹងពេលវេលា។ យើងនឹងរង់ចាំរហូតដល់នាទីចុងក្រោយ មុននឹងធ្វើការសម្រេចចិត្ត។ យើងនឹងរង់ចាំមើលនៅថ្ងៃស្អែកនេះថា ពួកគេនឹងចូលលេងបាន ឬអត់»។ លោកបានបន្ថែមទៀតថា៖ «ថ្ងៃស្អែកនេះ វានឹងក្លាយជាការសម្រេចចិត្តដ៏សំខាន់មួយលើផ្នែកសុខភាព ហើយបន្ទាប់មក យើងនឹងសម្រេចចិត្តទៅលើការលេងកីឡាបាល់ទាត់បន្ទាប់ពីនោះ»។
ប្រធានក្រុម Hazard និងខ្សែបម្រើដ៏មានឥទ្ធិពល De Bruyne សុទ្ធសឹងបានរងរបួស ក្នុងពេលក្រុមជម្រើសជាតិបែលហ្ស៊ិក បានយកឈ្នះលើក្រុមជម្រើសជាតិព័រទុយហ្គាល់ ក្នុងលទ្ធផល ១-០ ក្នុងវគ្គ១៦ក្រុមចុងក្រោយ កាលពីចុងសប្តាហ៍មុន។ បែលហ្ស៊ិក ដែលមានរហស្សនាមថា បិសាចក្រហម កំពុងតែប្រជែងដណ្តើមកៅអីទៅវគ្គពាក់កណ្តាលផ្តាច់ព្រ័ត្រ ជាលើកទី១ បើគិតចាប់តាំងពីឆ្នាំ១៩៨០ ដែលនៅពេលនោះពួកគេបានរងបរាជ័យក្រោមស្នាដៃក្រុមជម្រើសជាតិអាល្លឺម៉ង់ ខាងលិច ក្នុងវគ្គផ្តាច់ព្រ័ត្រ៕
ប្រភពព័ត៌មាន៖ Channel News Asia
