ខ្សែប្រយុទ្ធ Marcio បានបង្កើតឱ្យមានការចាប់អារម្មណ៍ជាថ្មី បន្ទាប់ពីរូបគេរកបាន៣គ្រាប់តែម្នាក់ឯង (ហែតទ្រីក) នៅពេលក្រុមណាហ្គាវើលដ៍ យកឈ្នះក្រុមនគរបាលជាតិ ៤-០ កាលពីថ្ងៃពុធ ចំណែកខ្សែប្រយុទ្ធ ចាន់ វឌ្ឍនាកា បានបំពេញតួនាទីយ៉ាងល្អជាថ្មីម្តងទៀត ដើម្បីជួយឱ្យក្រុមបឹងកេត អាចយកឈ្នះក្រុមម្ចាស់ផ្ទះអាស៊ីអឺរ៉ុប ៣-១។
បើទោះបីជាគ្រូបង្គោលក្រុមណាហ្គាវើលដ៍ លោក មាស ចាន់ណា បានសម្តែងការព្រួយបារម្ភទៅបញ្ហាទីលាន នៅកីឡដ្ឋាន 7NG ដែលពួកគេ មិនធ្លាប់ហ្វឹកហាត់សោះ នៅលើទីលាននេះ ប៉ុន្តែតាមរយៈការប្រកួត កាលពីម្សិលមិញនេះ ក្រុមណាហ្គាវើល នៅតែធ្វើបានល្អ ដើម្បីបង្កើតឱកាសរកបានដល់៤គ្រាប់។
ជាមួយជ័យជម្នះ ៤-០ លើក្រុមម្ចាស់ផ្ទះនគរបាលជាតិនេះ ខ្សែប្រយុទ្ធ Marcio អាចធ្វើបានហែតទ្រីកជាថ្មីម្តងទៀត តាមរយៈការស៊ុតទម្លុះសំណាញ់ទីក្រុមនគរបាលជាតិ នៅនាទីទី២១ ទី៣៣ និងនាទីទី៦២ ខណៈមួយគ្រាប់ទៀតរកបានដោយកីឡាករ គួច ដានី នៅនាទីទី៣៦ ហើយជ័យជម្នះនេះ បានជួយឱ្យក្រុមណាហ្គាវើលដ៍ អាចហក់ពីលេខ៧ មកឈរនៅលេខរៀងទី៣ វិញ ដោយមាន១១ពិន្ទុ តិចជាក្រុមឈរនៅលេខ១ អង្គរថាយហ្គឺរ ដែលមាន១៦ពិន្ទុ និងក្រុមភ្នំពេញក្រោន មាន១២ពិន្ទុ។
សម្រាប់ការប្រកួត កាលពីថ្ងៃពុធនោះដែរ ខ្សែប្រយុទ្ធ ចាន់ វឌ្ឍនាកា បានក្លាយជាស្នូលយ៉ាងសំខាន់ ក្នុងការនាំយកជ័យជម្នះឱ្យក្រមបឹងកេត ទទួលបានជ័យជម្នះលើក្រុមអាស៊ីអឺរ៉ុប ៣-១ ដោយការប្រកួតនេះ គេរកបាន២គ្រាប់តែម្នាក់ឯង ដោយការទាត់បាល់ពិន័យ១១ម៉ែត្រ បានសម្រេច នៅនាទីទី៤៨ និងបានបន្ថែម១គ្រាប់ទៀត នៅនាទីទី៦៩ ហើយ វឌ្ឍនាកា ក៏ជាអ្នកបញ្ចូលបាល់ឱ្យ សេត រ៉ូស៊ីប រកបាន១គ្រាប់ នៅនាទីទី ៨៦ ផងដែរ ខណៈ១គ្រាប់របស់ក្រុមម្ចាស់ផ្ទះ រកបានដោយខ្សែប្រយុទ្ធ Abee Ndjoo នៅនាទីទី៧៥។
តាមរយៈការរកបាន២គ្រាប់ លើកនេះ បន្ថែមទៅលើធ្វើតាមហែតទ្រីក នៅពេលក្រុមបឹងកេត បានយកឈ្នះក្រុមខេត្តព្រៃវែង ៣-១ កាលពីថ្ងៃអាទិត្យនោះ គឺបានបញ្ជាក់កាន់តែច្បាស់ថា ភាពខ្លាំងរបស់ ចាន់ វឌ្ឍនាកា បានវិលមកវិញហើយ ហើយក៏ជាអ្នកជួយឱ្យក្រុមការពារតំណែងជើងឯក បឹងកេត វិលមករកលើគន្លងផ្លូវដ៏ល្អវិញ ក្នុងការប្រជែងយកតំណែងជើងឯកជាថ្មី ផងដែរ ក្រោយចាញ់៣ប្រកួតជាប់ៗគ្នា នាការប្រកួត នៅដើមរដូវកាល ខណៈពេលនេះ បឹងកេត មាន៩ពិន្ទុ ជាមួយការឈ្នះ៣ និងចាញ់៣ដង៕
