ក្រុមកំពុងឈរនៅលើកំពូលតារាង អង្គរថាយហ្គឺរ មិនអាចរក្សាកំណត់ត្រាដ៏ល្អរបស់ខ្លួនបានទៀតនោះទេ ខណ:ពួកគេមិនអាចទប់មហិច្ឆតារកជ័យជម្នះរបស់ក្រុមម្ចាស់ផ្ទះ វិសាខា បាននោះ ចំណែកក្រុមភ្នំពេញក្រោន ដែលបានចាញ់បង់ក្រុមព្រះខ័នរាជស្វាយរៀង នៅតង់ទី១នោះ បែរជាអាចកែប្រែស្ថានភាពបានល្អប្រសើរវិញ នៅតង់ទី២ ហើយក៏ប៊ិះតែទទួលបានជ័យជម្នះ ជាលើកទី៥ជាប់ៗគ្នាផងដែរ។
បើទោះបីជា៧ប្រកួតកន្លងមកនេះ ក្រុមអង្គរថាយហ្គឺរ ធ្វើបានយ៉ាងល្អ និងមិនធ្លាប់ស្គាល់ការចាញ់ ដោយពួកគេ បានឈ្នះ៦ និងស្មើ១ដង ប៉ុន្តែសម្រាប់ការធ្វើដំណើរមកកាន់កីឡដ្ឋានព្រីនស៍ កាលពីថ្ងៃព្រហស្បតិ៍ម្សិលមិញ ក្រុមមានមូលដ្ឋាននៅខេត្តសៀមរាបមួយនេះ បានចាញ់ក្រុមវិសាខា ៣-១ ដែលគ្រាប់បាល់ជ័យជម្នះនេះ រកបានដោយខ្សែប្រយុទ្ធកម្ពស់ខ្ពស់ Haber Marcus នៅនាទីទី១៥ និងទី២០ និងគ្រាប់បាល់ចុងក្រោយរបស់ រ៉ឹង ប៊ុនហៀង នៅនាទីទី៨៨ ខណៈ១គ្រាបរបស់គ្រាប់ភ្ញៀវ រកបានដោយកខ្សែបម្រើ ឡុង ភារ៉ាត នៅនាទីទី៥៦។
យ៉ាងណាក៏ដោយ ការចាញ់ជាលើកដំបូងនេះ វានៅតែធ្វើឱ្យក្រុមអង្គរថាយហ្គឺរ អាចបន្តឈរនៅលេខ១ ព្រោះពួកគេ នៅតែមាន ១៩ពិន្ទខ្ពស់ជាងគេ ចំណែកក្រុមវិសាខា បានបន្តឈរនៅលេខ២ ដោយមាន១៤ពិន្ទុ លើក្រុមណាហ្គាវើលដ៍ និងក្រុមកងយោធពលខេមរភូមិន្ទ (ទ័ព) ដែលបានឡើងមកឈរនៅលេខ៣ និងលេខ៤ ដោយមាន១៤ពិន្ទុស្មើគ្នា។
ចំណែកកំណត់ត្រាដ៏ល្អរបស់ក្រុមម្ចាស់ផ្ទះ ភ្នំពេញក្រោន ស្ទើរតែត្រូវបំផ្លាញដោយក្រុមភ្ញៀវ ព្រះខ័នរាជស្វាយរៀង នៅកីឡដ្ឋាន RNS ទៅហើយ ប៉ុន្តែភ្នំពេញក្រោន បែរជាអាចកែប្រែស្ថានភាពបានយ៉ាងល្អវិញ ហើយក៏ស្ទើរតែរកបានជ័យជម្នះវិញផងដែរ។
តាមរយៈការប្រកួតយ៉ាងស្វិតស្វាញ កាលពីយប់ម្សិលមិញនេះ ខ្សែប្រយុទ្ធដ៏មានបទពិសោធ Privat រកបានគ្រាប់បាល់ឱ្យក្រុមស្វាយរៀង បាន២គ្រាប់ជាប់ៗគ្នា នៅនាទីទី៣៩ និងទី៤៥ មុនពេល លឹម ពិសុទ្ធ វាយបកបាន១គ្រាប់វិញ នៅនាទីទី ៤៥+២ ដែលធ្វើឱ្យការប្រកួតតង់ទី១ បានបញ្ចប់ដោយ ស្វាយរៀង នាំមុខ ភ្នំពេញក្រោន ២-១។
យ៉ាងណាក៏ដោយ នៅតង់ទី២ ភ្នំពេញក្រោន ដណ្តើមបានការមានប្រៀបមកវិញ ខណៈ លឹម ពិសុទ្ធ រកបានគ្រាប់បាល់ទី២ នៅនាទីទី៦២ ហើយ ប្រាក់ ធីវ៉ា បានបន្ថែម១គ្រប់ទៀត នៅនាទីទី៧៣នោះ ប៉ុន្តែការមានប្រៀបនេះ ត្រូវបានបញ្ចប់ ក្រោយពេលខ្សែប្រយុទ្ធ Lopez Mendy បានរកឃើញគ្រាប់បាល់ទី៣ ឱ្យក្រុមស្វាយរៀង នៅនាទីទី៨០នោះ។
ការបញ្ចប់ដោយលទ្ធផលស្មើគ្នា ៣-៣ នេះ បានធ្វើឱ្យក្រុមភ្នំពេញក្រោន និងក្រមស្វាយរៀង បានខ្ទាត់ចេញ ពីតំបន់កំពូលតារាងទាំង៤ដូចគ្នា គឺក្រុមទាំង២នេះ បានធ្លាក់ទៅឈរនៅលេខ៥ និងលេខ៦ ដោយមាន១៣ពិន្ទុស្មើគ្នា។ ចំណែកក្រុមអគ្គិសនីកម្ពុជា បានឡើងមកឈរនៅលេខ១០ ក្រោយពេលពួកគេបានយកឈ្នះក្រុមម្ចាស់ផ្ទះសូលទីឡូអង្គរ ១-០ កាលពីម្សិលមិញដែរ ដែលគ្រាប់បាល់ជ័យជម្នះនេះ រកបានដោយកីឡាករ ចន្ថ ចន្ធាកា នៅនាទីទី៣៦។
ទាក់ទងការប្រកួតនេះ លោក Oleg Starynskyi គ្រូបង្វឹករបស់ក្រុមសិង្ហក្រហមភ្នំពេញក្រោន បាននិយាយថា៖ «យើងលេងបានល្អ សម្រាប់ការប្រកួតនេះ គ្រាន់តែយើងមិនចង់បាននៅលទ្ធផលបែបនេះ ប៉ុន្តែជារួមមកខ្ញុំមានមោទកភាព ចំពោះការប្រកួត និងការបង្ហាញរបស់ក្រុមយើង»៕
