អ្នកចាំទីវ័យក្មេង គង់ រ៉ាហ្វាត់ ត្រូវបានគេមើលឃើញថា គឺជាតួឯក ឬជាកីឡាករដ៏សំខាន់ ដែលបានរារាំងមហិច្ឆតារបស់ក្រុមម្ចាស់ផ្ទះ ភ្នំពេញក្រោន ក្នុងការដណ្តើមយក៣ពិន្ទុ ពីក្រុមកងយោធពលខេមរភូមិន្ទុ (ទ័ព) សម្រាប់ការប្រកួតនៅកីឡដ្ឋាន ស្មាតអអេសអិន កាលពីយប់ថ្ងៃអាទិត្យ ម្សិលមិញ។
សម្រាប់ការបើកដំណើរការឱ្យមានការប្រកួតលីគកំពូលកម្ពុជា ឡើងវិញ បន្ទាប់ពីបានផ្អាកអស់រយៈពេល៣សប្តាហ៍នេះ ភ្នំពេញក្រោន ត្រូវបានគេផ្តល់ទំនុកចិត្តថា នឹងអាចប្រើកីឡដ្ឋានរបស់ខ្លួន ដើម្បីដណ្តើមយក៣ពិន្ទុ ប៉ុន្តែអ្វីៗបានប្រែប្រួល ក្រោមទម្រង់លេងបិទយ៉ាងល្អរបស់ទ័ព ជាពិសេសការជួយសង្រ្គោះជាច្រើនលើករបស់អ្នកចាំទី គង់ រ៉ាហ្វាត់។
តាមរយៈការប្រកួតយ៉ាងតានតឹង កាលពីថ្ងៃអាទិត្យនោះ ប្រាក់ ធីវ៉ា បានស៊ុតបំប៉ោងសំណាញ់ទីទៅលើក្រុមទ័ព បានយ៉ាងល្អ គឺត្រឹមនាទីទី៨ ប៉ុន្តែខ្សែប្រយុទ្ធកំពុងឡើងជើង ណារ៉ុង កក្កដា បានស៊ុតតាមស្មើឱ្យក្រុមភ្ញៀវវិញ នៅនាទីទី១១។
ជាមួយលទ្ធផលស្មើគ្នា ១-១ នេះ ក្រុមភ្នំពេញក្រោន បានប្រើរយៈពេលជាង២០នាទីទីចុងក្រោយ ដើម្បីវាយលុកទៅលើក្រុមទ័ព យ៉ាងខ្លាំង ក្នុងមហិច្ឆតា ស្វែងរកគ្រាប់បាល់ជ័យជម្នះ ប៉ុន្តែពួកគេ មិនអាចធ្វើបាននោះទេ ព្រោះគ្រាប់បាល់ស៊ុតដាច់មាត់ជាច្រើនលើករបស់ពួកគេ ត្រូវបាន គង់ រ៉ាហ្វាត់ ជួយសង្គ្រោះបានរហូត ដើម្បីរក្សាលទ្ធផលស្មើគ្នានេះ ដល់ចប់ការប្រកួត ជាផ្លូវការ។
ក្រុមទ័ព មានការរីករាយ និងពេញចិត្ត ទទួលយក ចំពពោះការចែកគ្នាម្នាក់១ពិន្ទុនេះ ប៉ុន្តែ ភ្នំពេញក្រោន ហាក់មិនសប្បាយចិត្ត ចំពោះការស្មើគ្នា ១-១ នេះទេ ព្រោះលទ្ធផលនេះ វាបានបន្ថយភាគរយរបស់ពួកគេ ក្នុងការប្រជែងយកលេខ១ ពីក្រុមវិសាខា បើទោះបីជាពេលនេះ ភ្នំពេញក្រោន នៅសល់ការប្រកួតក្នុងដៃតិចជាង ក្រុមវិសាខា ១ប្រកួតក៏ដោយ។
រ៉ាហ្វាត់ក៏ពេញចិត្តចំពោះការសហការយ៉ាងល្អក្នុងចំណោមសមាជិកក្រុមទាំងអស់ ហើយគេក៏មិនអាចប្រកែកបានឡើយពីការសមត្ថភាពដ៏ល្អរបស់ភ្នំពេញក្រោន។
សម្រាប់ការបង្ហាញទម្រង់លេងយ៉ាងល្អ នេះ អតីតអ្នកចាំទីក្រុមគិរីវង់សុខសែនជ័យ បានប្រាប់ប្រព័ន្ធផ្សព្វផ្សាយថា៖«ពិតណាស់ក្នុងការប្រកួតយប់មិញ នេះ វាគឺជាការប្រកួត លំបាក ដែលមានការទាត់ចំគោលដៅពីខាងគូប្រកួតច្រើន។ ខ្ញុំពិតជាសប្បាយចិត្តដែលក្រុម សហការគ្នាបានយ៉ាងល្អក្នុងតំបន់ការពារ ព្រោះក្រុមភ្នំពេញក្រោន ជាក្រុមដែលខ្លាំង និងមានខ្សែប្រយុទ្ធល្អច្រើន»៕
