បរទេស៖ លោក Ole Gunnar Solskjaer បានទទួលស្គាល់ថា ក្រុម Manchester United «ពិតជាមានសំណាងណាស់» ក្រោយពីខ្សែប្រយុទ្ធ Cristiano Ronaldo បានអបអរការបង្ហាញខ្លួនក្នុងក្របខ័ណ្ឌ Champions League ជាលើកទី១៧៨របស់គេ តាមរយៈការរកគ្រាប់បាល់ឈ្នះនៅនាទី ទី៩៥ ដើម្បីផ្តួលក្រុម Villarreal ក្នុងលទ្ធផល ២-១ នាកីឡដ្ឋាន Old Trafford កាលពីថ្ងៃពុធ។
ម្ចាស់ពានរង្វាន់បាល់មាស Ballon d’Or ៥សម័យកាលរូបនេះ កម្រមានឱកាសស៊ុតបាល់ក្នុងតំបន់ប្រយុទ្ធណាស់ រហូតទាល់តែរូបគេបានស៊ុតបាល់ផុតដៃអ្នកចាំទី Geronimo Rulli ដើម្បីរកគ្រាប់បាល់ទី៥របស់ ពីការប្រកួត៥លើក បើគិតចាប់តាំងពីវិលទៅកាន់ក្លិប Man United វិញ។ ក្រុមរបស់លោក Solskjaer ហាក់ដូចជាត្រូវប្រឈមមុខនឹងការធ្លាក់ចេញយ៉ាងអាម៉ាស ត្រឹមវគ្គចែកពូលនៃក្របខ័ណ្ឌ Champions League ទៅហើយ ក្រោយពីបានរបូតគ្រាប់បាល់នៅដើមតង់ទី២ តាមរយៈការស៊ុតបាល់បញ្ចូលទីយ៉ាងល្អរបស់ Paco Alcacer។ កីឡាករ Alex Telles បានស៊ុតបាល់បញ្ចូលទីយ៉ាងល្អដើម្បីរកគ្រាប់បាល់តាមស្មើវិញភ្លាមៗ ប៉ុន្តែ ពួកគេទំនងដូចជាត្រូវដណ្តើមបានត្រឹមតែ១ពិន្ទុក្នុងការប្រកួតពូល F ទៅហើយ នៅមុនពេល Ronaldo បានរកគ្រាប់បាល់កាត់សេចក្តី។
បើទោះបីលទ្ធផលបែបនេះក៏ដោយ Man United មិនបានបង្ហាញពីទម្រង់លេងដ៏រឹងមាំឡើយ ដែលនាំឲ្យមានសំណួរជាច្រើនសួរថា តើលោក Solskjaer គឺជាអ្នកអាចទាញយកសមត្ថភាពដ៏ខ្លាំងបំផុតពីក្រុមបិសាចក្រហមមួយនេះ ឬអត់ ខណៈដែលតារាឆ្នើមៗរបស់លោកហាក់ដូចជាមិនទាន់លេងស៊ីសង្វាក់គ្នានៅឡើយទេ៕
ប្រភពព័ត៌មាន៖ Channel News Asia
