ក្រុមជម្រើសជាតិកម្ពុជាអាយុក្រោម២៣ឆ្នាំ បានត្រៀមខ្លួនរួចរាល់ និងបានល្អផងដែរ ដើម្បីប្រកួតជម្រុះប្រចាំពូលK ជាមួយក្រុមU23 ហុងកុង ក្នុងពេលពានរង្វាន់ AFC U23 Asian Cup Uzbekistan 2022 នៅកីឡដ្ឋាន J-Village, Fukushima នាព្រឹកម៉ោង ១១ ថ្ងៃសៅរ៍នេះ មុនបន្តទៅជួបក្រុមម្ចាស់ផ្ទះជប៉ុន នៅថ្ងៃទី២៦ ខែតុលា វេលាម៉ោង ១១ព្រឹក ដូចគ្នា។
ការជួបជាមួយក្រុមហុងកុង នៅក្នុងការប្រកួតបើកឆាកនេះ ត្រូវបានគេមើលឃើញថា ជាពេលវេលាមួយ ដែលក្រុមU23កម្ពុជា អាចបង្ហាញការលេងដោយពេញទំហឹង ដើម្បីប្រជែងគ្នាយក៣ពិន្ទុ ព្រោះក្រុមU23ហុងកុង មានកម្រិតលេខ មិនលើសខ្វះគ្នាជាមួយកម្ពុជា ប៉ុន្មានឡើយ ហើយនៅក្នុងបញ្ជីឈ្មោះរបស់កីឡាករ គឺហុងកុង មិនបានដាក់បញ្ចូលកីឡាករកូនកាត់ ឱ្យចូលរួមជួយដល់ក្រុមរបស់ខ្លួន ដូចការប្រកួតក្រុមធំជម្រើសជាតិ របស់ពួកគេ នោះទេ។
ចំណែកម្ចាស់ផ្ទះ ជប៉ុន បានដាក់កីឡាករអាយុ២០ឆ្នាំ ភាគច្រើន ឱ្យចូលរួមប្រកួត ប៉ុន្តែបើប្រៀបធៀបពីកម្រិតលេង គឺជប៉ុន នៅតែស្ថិតនៅលើ កម្ពុជា និងហុងកុង ដែលត្រូវបានគេមើលឃើញថា ក្រុមម្ចាស់ផ្ទះមួយនេះ អាចនឹងទទួលបានចំណាត់ថ្នាក់លេខ១ ប្រចាំពូលK នេះ ខណៈកម្ពុជា និងហុងកុង ស្ថិតនៅក្នុងភាពប្រទាញប្រទុងគ្នាខ្លាំង ក្នុងការដណ្តើមយកលេខ២ ប្រចាំពូល ដែលមានត្រឹម៣ក្រុមនេះ។
ជាមួយគ្នានេះ ការហ្វឹកហាត់ និងប្រកួតនៅក្រោមបរិយកាសដ៏ត្រជាក់ ក៏បានផ្តល់ភាពអំណោយផលដល់ក្រុមម្ចាស់ផ្ទះជប៉ុន លើក្រុមភ្ញៀវកម្ពុជា និងហុងកុង ផងដែរ។ តែទោះបីជាយ៉ាងណា បើតាមលោក ឈូក ពិសិដ្ឋ អ្នកចាត់ការក្រុមជម្រើសជាតិកម្ពុជា បានប្រាប់ថា បានសមរួចរាល់ហើយទាំងទៅលើការហូកចុក ការស្នាក់នៅ បរិយាកាស ចំណែកការហ្វឹកហាត់ ក៏បានល្អផងដែរ ព្រោះម្ចាស់ផ្ទះ បានទទួល និងរៀបចំស្វាគមន៍ បានល្អគ្រប់ផ្នែកទាំងអស់ ដែលធ្វើឱ្យការរៀបចំគ្រប់បែបយ៉ាងរបស់កម្ពុជា បានល្អ។
យ៉ាងណាក៏ដោយ អ្នកគាំទ្រកម្ពុជា មិនអាចនឹងបានទស្សនាការប្រកួតរបស់ក្រុមU23កម្ពុជា នៅក្នុងការប្រកួតជម្រុះពានរង្វាន់ AFC U23 Asian Cup Uzbekistan 2022 នេះទេ ពិសេសជំនួបបើកឆាករបស់កម្ពុជា និងហុងកុក ព្រោះប្រទេសជប៉ុន ដែលជាម្ចាស់ផ្ទះ មិនមានការផ្សាយបន្តផ្ទាល់មកកម្ពុជាឡើយ។
ជុំវិញបញ្ហានេះ សហព័ន្ធកីឡាបាល់ទាត់កម្ពុជា (FFC) បានប្រកាសនៅលើផេចហ្វេសប៊ុករបស់ខ្លួន នៅថ្ងៃនេះថា៖ «មិនមានការផ្សាយបន្តផ្ទាល់មកកម្ពុជាឡើយ!ប្រទេសជប៉ុនដែលជាម្ចាស់ផ្ទះពូល K នៃពានរង្វាន់ AFC U23 Asian Cup Uzbekistan 2022 – Qualifiers មិនមានគម្រោងផ្សាយផ្ទាល់ការប្រកួត ក្រៅពីការប្រកួតរបស់ខ្លួនទេ (ជប៉ុន ជាមួយកម្ពុជា និងជប៉ុន ជាមួយ ហុងកុង) ហើយការប្រកួត ដែលផ្សាយផ្ទាល់ គឺមានតែលើទូរទស្សន៍ CS Nittele G+ របស់ជប៉ុន នឹងមិនមានការផ្សាយបន្តផ្ទាល់មកកម្ពុជាឡើយ»។
«សហព័ន្ធកីឡាបាល់ទាត់កម្ពុជា កំពុងតែទំនាក់ទំនងជាមួយសមាគមបាល់ទាត់ជប៉ុន ដើម្បីរកមធ្យោបាយឱ្យបងប្អូនអ្នកគាំទ្រយើង អាចទស្សនាការប្រកួតបាន»។ នេះជាការប្រាប់បន្ថែមរបស់ FFC ប៉ុន្តែលទ្ធផលយ៉ាងណានោះ នៅមិនទាន់ដឹងច្បាស់នៅឡើយទេ ខណៈអ្នកគាំទ្រកម្ពុជា ពិតជាចង់ទស្សនាការប្រកួតនេះខ្លាំង ព្រោះវាជាពេល ដែលអ្នកចាត់ការទៅលោក Keisuke Honda ជាវីរបុរសបាល់ទាត់ជប៉ុន និងក្រុមគ្រូបង្វឹកជប៉ុន រួមទាំងគ្រូជំនួយកម្ពុជា ត្រូវដឹកនាំក្រុមកម្ពុជា ប្រកួតផ្លូវការ នៅលើទឹកដីជប៉ុន ជាលើកដំបូង ហើយក៏ត្រូវជួបក្រុមម្ចាស់ផ្ទះជប៉ុន ផងដែរ៕
