បរទេស៖ លោក Ralf Rangnick អ្នកចាត់ការទូទៅរបស់ក្រុម Manchester United មានក្រុមដែលពេញកម្លាំងស្ទើរតែទាំងស្រុងហើយ ក្នុងការជ្រើសរើស សម្រាប់ការប្រកួតក្របខ័ណ្ឌ Premier League នៅថ្ងៃចន្ទ ជាមួយនឹងក្រុម Newcastle ក្រោយពីការផ្ទុះការឆ្លងកូវីដ ១៩ បានធ្វើឲ្យការប្រកួត២លើកចុងក្រោយរបស់ពួកគេត្រូវពន្យារពេល។
មានតែ Paul Pogba ប៉ុណ្ណោះ ដែលមិនទាន់អាចចូលលេងបាន ដោយសារតែបញ្ហារបួស ក្នុងការប្រកួតជាលើកដំបូងរបស់លោក Rangnick ក្នុងនាមជាគ្រូបង្វឹករបស Man United ក្នុងរយៈពេល១៦ថ្ងៃមកនេះ។ ការប្រកួតរបស់ក្រុម Man Utd ជាមួយនឹងក្រុម Brentford និង Brighton បានស្ថិតក្នុងចំណោមការប្រកួតទាំង១២លើកក្នុងក្របខ័ណ្ឌ Premier League ដែលត្រូវពន្យារពេល ក្នុងរយៈពេល២សប្តាហ៍កន្លងមកនេះ ដោយសារតែការឆ្លងជាបន្តបន្ទាប់លើវីរុសកូវីដ ១៩ ស្របពេលដែលអង់គ្លេស កំពុងតែប្រយុទ្ធប្រឆាំងនឹងករណីឆ្លងជាថ្មី។
លោក Rangnick បាននិយាយកាលពីថ្ងៃព្រហស្បតិ៍ថា៖ «វគ្គហ្វឹកហាត់ចុងក្រោយ យើងមានកីឡាករ៨នាក់ និងអ្នកចាំទី៣នាក់ ហើយបន្ទាប់មក យើងបិទទីលានហ្វឹកហាត់ ដើម្បីផ្អាកសង្វាក់ហ្វឹហាត់។ នៅថ្ងៃនេះ គឺជាថ្ងៃហ្វឹកហាត់ទី៣ នៅសប្តាហ៍នេះ ហើយយើងមានកីឡាករដល់ទៅ២៥នាក់ Paul Pogba នៅតែអវត្តមាន ប៉ុន្តែ កីឡាករផ្សេងទៀតសុទ្ធសឹងបានបង្ហាញមុខ»៕
ប្រភពព័ត៌មាន៖ Channel News Asia
