បរទេស៖ ក្រុមហ៊ុន Raine Group ដែលជាធនាគារអាមេរិក និងជាអ្នកគ្រប់គ្រងលើការលក់ក្លិប Chelsea របស់ក្របខ័ណ្ឌ Premier League គ្រោងធ្វើការកាត់បន្ថយបញ្ជីឈ្មោះបេក្ខភាពដែលដេញថ្លៃចង់ទិញក្លិបនេះ មកនៅត្រឹម៣ នៅថ្ងៃអង្គារនេះ ស្របពេលដែលក្រុមហ៊ុនមួយដែលដឹកនាំដោយលោក Nick Candy កំពុងបង្កើនសាច់ប្រាក់ក្នុងសំណើរបស់ខ្លួន។ នេះបើយោងទៅតាមប្រភពនានាដែលបានប្រាប់សារព័ត៌មាន Reuters។
ដំបូងឡើយ Chelsea ត្រូវបានដាក់លក់ដោយម្ចាស់ក្លិបលោក Roman Abramovich ក្រោយពីការឈ្លានពានរបស់ប្រទេសរុស្ស៊ី ក្នុងប្រទេសអ៊ុយក្រែន ហើយនៅមុនពេលទណ្ឌកម្មនានា ត្រូវបានដាក់លើមហាសេដ្ឋីជាអ្នកជំនួញរូបនេះ ដោយរដ្ឋាភិបាលចក្រភពអង់គ្លេស ក្រុមហ៊ុន Raine Group ក៏ទទួលបានសិទ្ធិគ្រប់គ្រងក្លិបតែម្តង។ ក្រុមហ៊ុន Raine បានកំណត់កាលបរិច្ឆេទចុងក្រោយត្រឹមថ្ងៃសុក្រ សប្តាហ៍មុន ដើម្បីទទួលសំណើនានា ដែលត្រូវដាក់ ដោយសំណើខ្លះ ត្រូវបានដាក់ជាសាធារណៈ ហើយប្រភពដែលនៅជិតដិតការដាក់លក់ក្លិបនេះ បាននិយាយថា មានសំណើជាច្រើនទៀតត្រូវបានដាក់ជាឯកជន។
ដើម្បីធ្វើឲ្យនីតិវិធីនានា មានដំណើរការទៅមុខ ក្រុមហ៊ុន Raine ដែលមានតួនាទីជាអ្នកប្រឹក្សារបស់ក្លិប នឹងកាត់បន្ថយបញ្ជីឈ្មោះអ្នកដេញថ្លៃ ដោយសារតែនីតិវិធីនានា ត្រូវបានធ្វើឲ្យយឺត ដោយសារតែសំណើជាច្រើនទៀតត្រូវបានដាក់ជាបន្តបន្ទាប់។ ជាមួយគ្នានេះ សេដ្ឋីអចលនទ្រព្យលោក Candy បានដាក់សំណើមួយក្នុងទឹកប្រាក់២ពាន់លានផោន (ស្មើនឹង២,៦៣លានដុល្លារអាមេរិក) ទៅកាន់ក្រុមហ៊ុន Raine កាលពីថ្ងៃសុក្រ ប៉ុន្តែចាប់តាំងពីពេលនោះ បានបង្កើនទំហំទឹកប្រាក់របស់ខ្លួន ប៉ុន្តែ មិនបានបង្ហាញតួលេខជាក់លាក់ឡើយ៕
ប្រភពព័ត៌មាន៖ Channel News Asia
