ក្រុម Liverpool ត្រូវតែរក្សាទម្រង់លេងប្រកបដោយភាពមុតស្រួចរបស់ខ្លួនក្នុងការប្រកួតលើទឹកដីខ្លួនឯងក្នុងក្របខ័ណ្ឌ Premier League នៅរដូវកាលនេះ និងត្រូវតែ «រក្សានូវការស្រេកឃ្លាន» ដើម្បីជួយជំរុញការប្រជែងរបស់ពួកគេសម្រាប់កៅអីក្រុមខ្លាំង៤។

នេះបើយោងទៅតាមការបញ្ជាក់របស់លោក Jurgen Klopp។ ក្លិបមានមូលដ្ឋាននៅតំបន់ Merseyside មួយនេះ បានឡើងទៅឈរក្នុងចំណាត់ថ្នាក់លេខ២នៅលើតារាងក្របខ័ណ្ឌ Premier League ក្នុងរយៈពេលដ៏ខ្លីបន្ទាប់ពីក្រុមកំពុងតែនាំមុខ Manchester City ក្រោយពីបានកត់ត្រាជ័យជម្នះក្នុងលទ្ធផល ៤-១ លើក្រុម West Ham United កាលពីថ្ងៃសៅរ៍ នាកីឡដ្ឋាន Anfield នៅមុនពេលក្រុម Manchester United បានឡើងទៅឈរពីលើពួកគេវិញ ក្រោយពីបានកត់ត្រាជ័យជម្នះ ២-១ លើក្រុម Chelsea កាលពីថ្ងៃអាទិត្យ។

Liverpool មាន៥៧ពិន្ទុ ខណៈដែលនៅសល់ការប្រកួត ១០លើកទៀតក្នុង Premier League ដោយឈរពីលើក្រុម Tottenham Hotspur និង Chelsea ក្នុងការប្រជែងដណ្តើមកៅអីមួយទៅកាន់ក្របខ័ណ្ឌ Champions League នៅរដូវកាលក្រោយ។ លោក Klopp បានឲ្យដឹងថា៖ «បច្ចុប្បន្ន យើងស្គាល់ចិត្តគ្នាយ៉ាងច្បាស់ យើងចូលចិត្តគ្នា យើងមានពេលវេលាកាន់តែរីករាយជាមួយគ្នា ទាំងរឿងឯកជន និងនៅលើទីលានបាល់ទាត់។ បច្ចុប្បន្ន យើងត្រូវតែរក្សាការស្រេកឃ្លានសម្រាប់ការប្រកួតដែលនៅសល់ យើងត្រូវតែរក្សាការឆ្ពោះទៅមុខ»។

ក្រុម Liverpool កំពុងតែស្ថិតយ៉ាងប្រកៀកក្នុងការឈានទៅវគ្គ៨ក្រុមចុងក្រោយនៃក្របខ័ណ្ឌ Champions League ក្រោយពីបានផ្តួលក្រុម Porto ៥-០ ក្នុងការប្រកួតជើងទី១។ ពួកគេបានឈ្នះពានក្នុងយុទ្ធនាការនេះ កាលពីរដូវកាលឆ្នាំ២០០៤-២០០៥៕