ខ្សែប្រយុទ្ធ Pedro Rodriguez បានចូលលេងក្នុងនាមជាកីឡាករបម្រុង ដើម្បីរកគ្រាប់បាល់ឈ្នះសម្រាប់ក្រុម Chelsea នៅនាទីបន្ថែម ១៥នាទី ២ដង ក្នុងពេលពួកគេទទួលជ័យជម្នះក្នុងលទ្ធផល ២-១ នៅលើទឹកដីក្រុម Leicester កាលពីថ្ងៃអាទិត្យ ដើម្បីឈានទៅវគ្គពាក់កណ្តាលផ្តាច់ព្រ័ត្រនៃពាន FA Cup។

គ្រាប់បាល់ស៊ុតបញ្ចូលទីជាលើកទី១ របស់ខ្សែប្រយុទ្ធ Alvaro Morata ចាប់តាំងពីថ្ងៃ Boxing Day ក្នុងការវិលត្រឡប់ទៅកាន់ជម្រើសទាំង១១នាក់ដំបូងរបស់ Chelsea វិញ បានជួយឲ្យក្រុមភ្ញៀវមួយនេះ ស្ថិតនៅលើផ្លូវនៃការស្តារមុខមាត់ពីការធ្លាក់ចេញរបស់ពួកគេក្នុងក្របខ័ណ្ឌ Champions League ក្រោមស្នាដៃក្រុម Barcelona កាលពីពាក់កណ្តាលសប្តាហ៍មុន។ ប៉ុន្តែ ទោះបីជាយ៉ាងណា គ្រាប់បាល់តាមស្មើរបស់ខ្សែប្រយុទ្ធ Jamie Vardy នៅរយៈពេល១៥នាទីចុងក្រោយ បានបង្ខំឲ្យ Chelsea ត្រូវធ្វើការប្រកួតនៅនាទីបន្ថែម ១៥នាទី ២ដងតែម្តង។ ប៉ុន្តែ ក្រោយពីលោក Antonio Conte បានត្អូញត្អែនៅរដូវកាលនេះអំពីភាពខ្លាំងរបស់ក្រុមខ្លួន គ្រូបង្វឹកសញ្ជាតិអ៊ីតាលីរូបនេះ បានដាក់ការជឿជាក់ទៅលើ Pedro ក្នុងការផ្លាស់ប្តូរលទ្ធផលរបស់ Chelsea នៅពេលដែលរូបគេបានតែតបាល់បញ្ចូលទីពីការបញ្ជូនរបស់ខ្សែបម្រើ N’Golo Kante។

លោក Conte បានកោតសរសើរភាពខ្មាំងលើរាងកាយ និងស្មារតីរបស់ក្រុមខ្លួនក្នុងការជម្នះលើការខកចិត្តក្នុងក្របខ័ណ្ឌ Champions League របស់ពួកគេ។ លោក ទាក់ទងនឹងការស៊ូទ្រាំនឹងអាកាសធាតុត្រជាក់ខ្លាំងនៃក្រុមរបស់លោក លោក Conte បានឲ្យដឹងថា៖ «បន្ទាប់ពីការប្រកួតជាមួយនឹង Barcelona កុំភ្លេចថា យើងបានចំណាយថាមពលជាច្រើន ហេតុនេះ ការលេងរយៈពេល១២០នាទីនៅរាត្រីនេះ ក្នុងអាកាសធាតុបែបនេះ មិនមែនជារឿងងាយស្រួលឡើយ»៕